యేమున్నది తెలంగాణమున గర్వకారణము..

యేమున్నది తెలంగాణమున గర్వకారణము..
యే పేజి తిరగేసిన రక్తసిక్తం..
యే పుట తిప్పిన ద్రోహుల రక్త దాహం..
యే పుస్తకము తెరచిన కలిసిరాని కాలపు నెత్తుటి మరకలు
యే చరిత్ర చదివిన బలిదానాల శవప్రహసనం..
యే కలముని కదిలించిన శిథిల సమాజపు ప్రవాహం…
యే మనిషిని కదిలించిన మండిన గుండెల అవక్షేపం..
యే తరముని ప్రష్నించిన తీరని ఆకలి పోరాటం..
యే గుండెని తడిమి చూసిన వ్యధ శిలగ మారిన ఆఖరి ఆరాటం..
దాగిన దేవుడు ఎంతకు మారడు..
ఆశతీరు మార్గము ఎంతకు దొరకదు..
కలములన్ని కొలుములయినా
కలికాలం కలిసొచ్చినా
యేమున్నది తెలంగాణమున గర్వకారణము

“మా అవ్వే తెలంగాణా” »« Jai Telangana – Krishna Chaitanya Allam

Jai Telangana – Krishna Chaitanya Allam

చినుకు తాకగ
చిరునగవై,
పుడమి పులకరింత..
చేరిన నేలన
నాల్గు దిక్కులై
కురవగ జల్లింత..
కవిత కదనమై
కారు మబ్బుల నీడలనొదిలి
కడలికేగి
కవనమయ్యింది..
కాని..
కాలం
కుబుసమై
కాళనాగుల ఒడిని వదిలి
కళంకమయి కాలం చేసింది..
నిన్న పాడిన పాటయేదొ,
ఆలంబనై
ఆరాటంగా రోదిస్తుంది..
చప్పున చిన్న చప్పుడేదో
అవిశ్రాంతంగ నసపెడుతుంది..
ఎక్కడొ
ఎగసిన అల
అలవాటుగ
అలమటించి
అంతమొందింది..
వసంతం
ఒక్కొక్కటిగ
పూసిన పూలన్నింటిని
హతమారుస్తున్నది..
ఇనుప సంకెళ్ళ
నలిగిన
నలుగురు
రక్తమొడుతున్నరు..
తెగిన గాయాలు
గాథల గాట్లు..
మానక ముండె
కొత్త కోతలు..
కోటి పర్వాలు..

సల్లని సాయంకాలం
అసుర సంధ్యై
అదరగొడుతున్నది..
వడగాల్పులు..
విషమేదో
విధితలపై
విహరిస్తున్నట్టు..
..
తలవంచని
శిరసులన్ని
తెగిపడుతున్నవి..
కారుతున్న రుధిరమే
ఇంధనమై..
కనులు నిప్పు కణికలై..
మాటలు పాటలు
మంటల పాలయి
మసిబారినవి..
ఓదార్పులు
ఓర్వని తలపులు
తగని చెలిములు..
ఉరికోతలు
ఊచకోతలు..
తడి గుడ్డలతో
తెగిపడిన తలలు..
ఊరు వాడ
దినము దిక్కు
మంటలు ..
తెగిన గొంతులు..
రొద పెట్టు
గుడి బడి గంటలు..
..
చిన్నాభిన్నం
విచిత్రం..
చిధ్రం..
బతుకొక చిదిమిన చిత్రం..
ఎండిన గొంతుల
తెగ్గోసి చూసిన
తడిలేదు..
మండిన కడుపుల
మసితప్ప
మనుగడ లేదు..
ఏడుపులెడారులు..
అస్తమించే
తూరుపు సూరీడులు..
పడిలేషె కెరటాలు..
చైతన్య కిరణాలు..
అగ్గిల కాలే వెచ్చని వర్ణాలు..
నిక్కచ్చిగ పచ్చిగ నిజాలు..
అలుపెరగని
శ్రమ తెలవని పోరాటం..
కసి తగ్గని ఆరాటం..
పడిలేషె ప్రాణమొక కెరటం..
గుది బండల గుండెల
గుప్పెడు ఉబలాటం..
..
ఇంతింతై
వామనుడు వాడు
చూడగ కొండంతై..
ఉరకల ఉద్యమం..
పదుగుల పొద్దుల
ఎలుగుల ఎల్లువ…
జిలుగుల ఎన్నెల..
మల్లి కురిసెను కొన్ని
స్వాతి చినుకులు..
తడిసిన మొలకల మొదల్లు..
పచ్చిగ తాకెనడుగులు..
పచ్చగ మెరిసెను చిగురులు..
ఒక్కొక్కటిగ
మరొక్కటిగ.. ..
చినుకు చినుకు..
మిణుకు మిణుకు..
పరుగు ఉరక..
కోట్లుగ జతగ..
సవ్వడి చేసెను శంఖారావం..
లెవ్వగ పాడెను సంధ్యారాగం..
రేపటి లోకం..
చీకటి తోలగ..
అడుగున పదమై..
పదమే ప్రళయమై..
జనం ప్రభంజనం..
రణమే నినదం..
పలుకే ప్రవహం..
ఉరుకే ఉద్యమం..
అణువణువు ప్రతి కణం..
తెలంగాణం..
అడుగడుగు ప్రతి గణం..
తెలంగాణం..
గుండెపాడు చివరి గానం..
తెలంగాణం..
రగులుతున్న నిప్పుకణం..
తెలంగాణం..
తిరుగు బాటు ధిక్కార నాదం..
తెలంగాణం..
బిగిసిన కోటి పిడికిళ్ళ ఉక్కు బలం..
తెలంగాణం..
రాలే వడగళ్ళ పోరాట స్వరూపం..
తెలంగాణం..
కన్నీటి కడగళ్ళ రౌద్ర రూపం..
తెలంగాణం..
అమరవీరుల ఆఖరి వందనం
తెలంగాణం..
తెలంగాణ..
తెచ్చేదాకా ..
వచ్చేదాకా..
చూసేదాకా..
తరం తరం నిరంతరం..
శ్రమిస్తాం అహోరాత్రం..
జై తెలంగాణ..
జై జై తెలంగాణ..

యేమున్నది తెలంగాణమున గర్వకారణము.. »« పోరు చరిత by Allam Krishna Vamshi