సెన్సార్‌ చిక్కులు మిమ్మల్ని చాలా ఇబ్బందిపెట్టినట్లున్నాయి?
ఇలాంటి చిక్కులు ఎదురైతే ఇబ్బంది తప్పదు కదా. ఈ విషయంలో నేను తెలంగాణ ప్రజలకు కృతజ్ఞతలు చెప్పాలి. ఇది మా సినిమా అంటూ ప్రతి ఒక్కరూ ముందుకొచ్చారు. ఆందోళనలు నిర్వహించి మద్దతుగా నిలిచారు. వారి పోరాటం ఫలితంగానే ఈ సినిమా ప్రేక్షకుల ముందుకొస్తోంది.

సెన్సార్‌వాళ్లు కొన్ని సన్నివేశాలకు కత్తెర వేశారట. దాని ప్రభావం సినిమాపై ఏ మేరకు ఉంటుంది?
కొన్ని సన్నివేశాలపై అభ్యంతరాలు లేవనెత్తారు. కొన్నింటిని తొలగించాలని అడిగారు. దానికి మేం ఒప్పుకోవడంతో సమస్య పరిష్కారమైంది. సినిమాపై వాటి ప్రభావం ఉండదు.

కేవలం పోరాటాన్ని మాత్రమే తెరపై చూపిస్తున్నారా?
సామాజిక బాధ్యతతో కూడిన ఉద్యమ నేపథ్యంతో రూపుదిద్దుకొన్న చిత్రమిది. అయితే ఇందులో కుటుంబం, ప్రేమ, త్యాగం, జ్ఞానం, యుద్ధం… ఇలా అన్నీ ఉంటాయి. తెలంగాణ సంస్కృతి, సంప్రదాయాలు, కళలు, కులవృత్తులు… ఇలా పలు సామాజిక అంశాలకూ సినిమాలో ప్రాధాన్యం ఉంది.

తెలంగాణ ఉద్యమానికున్న చరిత్ర సుదీర్ఘమైనది. ఇందులో ఏయే అంశాలను స్పృశించారు?
మనకు స్వాతంత్య్రం వచ్చినప్పటి నుంచి నేటి వరకు జరిగిన, జరుగుతున్న ఉద్యమాన్ని ఈ చిత్రంలో చూడొచ్చు. అయితే 1948 నుంచి 2009 వరకు జరిగిన పోరాటం పదిశాతం ఉంటే, 2009 నుంచి నేటి వరకు జరిగిన ఉద్యమాన్ని యధార్థంగా చూపే ప్రయత్నం చేశాం.

మూడు ప్రాంతాలనీ ప్రభావితం చేస్తున్న సున్నితమైన అంశమిది. మిగిలిన ప్రాంతాల వారికీ మీ కథాంశం నచ్చుతుందా?
ఇది ప్రజలను గాయపరిచే చిత్రం ఎంతమాత్రం కాదు. వాళ్లను మభ్యపెట్టి దోచుకొంటున్న నాయకులే ఇందులో విలన్‌లు. ఆంధ్ర, తెలంగాణ, రాయలసీమ… ఇలా ప్రాంతాలు ఏవైనా అక్కడి ప్రజలకు కళారూపంలో ఒక సమాచారాన్ని ఇచ్చే ప్రయత్నం చేశాం.

జగపతిబాబును కథానాయకుడిగా ఎంచుకోవడానికి కారణమేమిటి?
పోరుబాటలో పయనించి అమరుడయ్యే ఒక ఉద్యమకారుడి పాత్ర ఆయనది. ఆ పాత్రకి జగపతిబాబు అయితేనే న్యాయం చేస్తారనిపించింది. కథ వివరించగానే ఆయన ఒప్పుకొన్నారు. కవికి, కళాకారుడికి కుల, మత, ప్రాంత బేధాలుండవని నిరూపించారు.

తెలంగాణ పోరులో ఎంతోమంది అమరులయ్యారు. జగపతిబాబు పోషించిన పాత్రకు స్ఫూర్తి ఎవరు?
బందగి గోపన్న అనే పాత్రలో జగపతిబాబు నటించారు. తెలంగాణ పోరాటానికి గుర్తుగా ఒక తండ్రి తన కొడుక్కి పెట్టుకొన్న పేరు అది. బందగి అంటే ఒక ముస్లిమ్‌, గోపన్న హిందువు. ముఖ్యంగా కులమత బేధాలు లేని చరిత్ర తెలంగాణ పోరాటానిది. అదే విషయాన్ని ఆ పాత్ర ద్వారా చెప్పే ప్రయత్నం చేశాం.

కథలో పోరాటంతోపాటు, ప్రేమ కూడా ఉందన్నారు. సినిమాకి వాణిజ్య విలువలు అద్దే ప్రయత్నమా?
నేటి తరానికి అద్దం పట్టే కథ అది. దాన్ని కూడా ఉద్యమంలో భాగంగానే చూపించాం. చదువు, కెరీర్‌, ప్రేమ… ఇలా ఎవరికి వారు వ్యక్తిగత జీవితాలతో ముందుకెళుతున్న తరుణంలోనూ పోరాటంలో భాగస్వాములైన వైనాన్ని సినిమాలో చూపించాం.

కేసీఆర్‌తో పాట రాయించాలన్న ఆలోచన ఎలా వచ్చింది?
ఆయన రాసిన గారడి చేస్తుండ్రు.. అనే పాట శ్రోతలకి నచ్చింది. ధూం ధాం కార్యక్రమంలో భాగంగా కేసీఆర్‌ కొన్ని పాటలు రాశారు. అవి విన్నాక… ఆయనతో ఓ పాట రాయించుకోవాలనే ఆలోచన కలిగింది.

తెలంగాణ సాయుధ పోరాటంపై సినిమా తీయాలన్నది నా చిరకాల కోరిక. అది నా మనస్సులో అలాగే వుండిపోయింది. పది సంవత్సరాల క్రితం దానిని సెట్స్‌మీదికి తీసుకురావాలని బలంగా అనుకున్నాను. అదే నేపథ్యంతో స్క్రిప్ట్ సిద్ధం చేసుకునే ప్రయత్నాలు మొదలుపెట్టాను. కొన్నాళ్లకు స్క్రిప్ట్ వర్క్ కూడా పూర్తయ్యింది. పెద్ద బేనర్ ఒకటి అనుకున్నాను. దాంతో పాటు ఒక ప్రముఖ హీరోను ఊహించుకున్నాను. కారణాలేవైనా తెలంగాణ సాయుధ పోరాటం సెట్స్ మీదకు వెళ్లలేదు. డిసెంబరు 29న చౌటుప్పల్‌లో జరిగిన శ్రీకాంతాచారి సంస్మరణసభకు వెళ్లినపుడు నడుస్తున్న తెలంగాణ చరిత్ర ఆధారంగా సినిమా తీయాలనిపించింది. ఆ క్షణంలోనే జై బోలో తెలంగాణ సినిమా మనసులో రూపుదిద్దుకుంది. ప్రకటన చేశానే కానీ ఆ తరువాత సినిమా పరిశ్రమలోకి నడచివచ్చిన దారి గుర్తొచ్చింది. ఆలోచనల్లో పడ్డాను.

****

మాది నల్గొండజిల్లా చిరుమర్తి గ్రామం. ఇంట్లో మధ్యతరగతి వాసనలు. చదువు అంతంత మాత్రం. రెగ్యులర్ చదువుకంటే సాహిత్యపుస్తకాలపై ఆసక్తి వుండేది. పాలిటెక్నిక్ మధ్యలో ఆపేశాను. నటుడు, దర్శకుడు ప్రభాకర్‌రెడ్డిది మా పక్క ఊరే. బతుకమ్మ, సంక్రాంతి పండగల సమయంలో ఆయన కనిపిస్తుండేవారు. కొంతమంది దగ్గర ప్రభాకర్ రెడ్డి గురించి విన్నాను. సినిమాల గురించి నా ఆసక్తి ఆయనకు చెప్పాను. 1984లో హైదరాబాద్ వచ్చేశాను. ప్రభాకర్ రెడ్డి దగ్గర అసిస్టెంట్‌గా చేరాను. దాదాపు పదమూడు సంవత్సరాలు అసిస్టెంట్ డైరెక్టర్‌గా పనిచేశాను.

ప్రభాకర్‌రెడ్డి తరువాత బి. భాస్కరరావు, ఇ.వి.వి సత్యనారాయణ, ఎ.కోదండరామిరెడ్డి, కృష్ణారెడ్డిల వద్ద పని చేశాక 1997లో ఎన్‌కౌంటర్ సినిమాతో దర్శకుడినయ్యాను. సాధారణంగా తొలిసినిమాలో ఎవరూ రిస్కు చేయరు. ప్రేమ, కామెడీ, ఎంటర్‌టైన్‌మెంట్ ట్రాక్‌లెంచుకుంటారు. కానీ నేను పెరిగిన పరిస్థితులు, మధ్యతరగతి బతుకుల్లోని కష్టాలు, బాధలు, కన్నీళ్లు, ఆశలు వీటన్నిటితో ఎన్‌కౌంటర్ తీశాను. దానికి పేరొచ్చింది. ఆ తరువాత వరుసగా ఆఫర్లు వచ్చాయి. శ్రీరాములయ్య, యమజాతకుడు, జయంమనదేరా, భద్రాచలం, ఆయుధం, రామ్ వరకు సినిమాలు చేసుకుంటూ వెళ్లాను. మధ్యలో ఒక కన్నడ సినిమా చేశాను. నా సినిమాల్లో కొత్తవారిని పరిచయం చేశాను.

అలా నేను పరిచయం చేసిన పాటల రచయితలే దాదాపు 15 నుంచి 20 మంది వరకు వున్నారు. ఇలాంటి పరిస్థితిలో లైఫ్ వెరీ కూల్. పేరుంది,క్రియేటివిటీ వుంది. కొత్త టెక్నాలజీని అప్‌డేట్ చేసుకునే శక్తి వుంది. ఎంటర్‌టైన్‌మెంట్స్‌తో ముందుకెళ్లవచ్చు. సక్సెస్ రేటు మరింత పెంచుకోవచ్చు. కానీ నేను పుట్టిపెరిగిన తెలంగాణ నెత్తురోడుతున్న పరిస్థితులు నన్ను నిలువనీయలేదు. బహుశా లోలోపల ఇంకిపోయిన ఆ ఆవేదనే నాతో జై బోలో తెలంగాణ ప్రకటన చేయించింది.

****

కళాకారునిగా నా తెలంగాణ ఉద్యమానికి ఏదో ఒకటి చేయాలి అనుకున్నాను. కాని ఆ నిర్ణయంతో మొత్తం సినిమా జీవితాన్ని త్యాగం చేస్తున్నట్టే అనిపించింది. నిర్మాతలెవరూ ముందుకు రాలేదు. ఏవో తిప్పలుపడి నేనే తీసినా సినిమా ఫెయిలైతే పరిస్థితి ఎలా వుంటుందో? ఊహించడమే కష్టం. సినిమాకు తెలంగాణ పేరు పెట్టుకున్నాను కాబట్టి మిగతావారు చాన్స్‌లు ఇవ్వకపోవచ్చు.

వాళ్ల కారణాలు వాళ్లకుంటాయి. ఎందుకంటే నాపై తెలంగాణ ముద్ర పడుతుంది. అవకాశం ఇవ్వాలంటే ఎన్నో లెక్కలు. ఇవన్నీ ఒక వైపు కంటి ముందు పరిస్థితులు మరోవైపు. గత ఏడాది డిసెంబరు తొమ్మిది తరువాత తెలంగాణలో ఒకరని కాదు, చేతివృత్తుల వాళ్లు, కులవృత్తుల వాళ్లు, సంఘాల వాళ్లు అందరూ జై తెలంగాణ అంటున్నారు. రోడ్లెక్కుతున్నారు. చివరకు బిచ్చగాళ్లు సైతం ఒక జె.ఎ.సిగా ఏర్పడి బ్యానర్లు పట్టుకున్నారు. ఇక విద్యార్థుల త్యాగాలు మాటల్లో చెప్పలేనివి. వీటన్నిటినీ గుండెతో విన్నాను. కళ్లారా చూశాను. అందుకే ఎన్ని కష్టాలు ఎదురైనా కళాకారునిగా నా బాధ్యత నిర్వర్తించాలనుకున్నాను. సర్వం ఒడ్డాను. జై బోలో తెలంగాణ సినిమా నిర్మించడానికి సిద్ధపడ్డాను.

****

కళకు మతం లేదు. కులం లేదు. ప్రాంతీయతత్వం అంతకంటే లేదు. ఇవన్నీ వుంటే ఈరోజు జై బోలో తెలంగాణ పాటలు సీమాంధ్ర లో వినిపించకపోవాలి. కానీ అక్కడ కూడా ఈ సినిమా ఆడియో పెద్ద సక్సెస్. సినిమాలో తొంభైశాతం నూతన నటీనటులు, పదిశాతం పాతనటులు -జై బోలో తెలంగాణ తొలినాటి లక్ష్యాల్లో ఇదీ ఒకటి. సినిమాలో ముఖ్య పాత్రకోసం ప్రముఖ నటుడిని పెట్టుకోవాలనీ, హీరో తల్లి పాత్రలో షబనాఆజ్మీ వంటి పేరున్న నటితో నటింపజేయాలనుకున్నాను. తొంభైశాతం కొత్తనటుల్లో డెభ్బైశాతం మంది తెలంగాణ ప్రాంతం వారు వున్నారు. మిగతా ఇరవై శాతం ఇతర ప్రాంత నటులున్నారు.

సినిమాల్లో అవకాశాల కోసం తిరిగే వారికి ప్రాధాన్యతనిచ్చాను. సినిమాలో వచ్చిన సాహిత్యమంతా తెలంగాణ ప్రాంతం వారు అందించినదే. ఈ సినిమాకు రాసిన వారు, పాడిన వారు అందరూ తెలంగాణ వారే. ఈ విషయంలో వాళ్లతోనే రాయించాలనీ, పాడించాలనీ రూలేమీ పెట్టుకోలేదు. అదే కాకతాళీయంగా జరిగింది. ముందే ప్రకటించినట్టు ముఖ్యపాత్రకోసం జగపతిబాబును ఎంచుకున్నాను. దీనికన్నా ముందు స్క్రిప్ట్ వర్క్ జరగాలి. కథ తయారు కావాలి. ఇలాంటి సినిమా నిర్మాణంలో అది చాలా పెద్ద పని. పకడ్బందీగా జరగాల్సిన పని.

****

శ్రీకృష్ణకమిటీ రిపోర్ట్ 2010 డిసెంబరులో వస్తుంది. ఇది ముందే తెలిసిన విషయం. అందువలన కమిటీ రిపోర్టుకు ముందే సినిమాను విడుదల చేయాలనుకున్నాను. స్క్రిప్ట్‌ను చాలా మందికి చెప్పాను. మార్చిలో షూటింగ్ మొదలుపెట్టాము. అప్పుడే సమస్యలు మొదలయ్యాయి. ఉద్యమం కొనసాగుతున్న దశలోనే దానికి సమాంతరంగా నిర్మితమైన అరుదైన సినిమా ఇది. అందువలన జరుగుతున్న పరిణామాలను విస్మరించలేని పరిస్థితి. ఇంకోవైపు వాటన్నిటినీ ఏకరువుపెడితే ఇదో డాక్యుమెంటరీ అయిపోతుంది. ఈ రెండింటికి మధ్యస్థంగా ఉండాలనుకున్నాను.

దీంతో షూటింగ్ జరుగుతున్నంతకాలం స్క్రిప్ట్‌ను మార్చుకుంటూనే, ఎప్పటికప్పుడు ఫ్రెష్‌నెస్ తీసుకురావడానికి ప్రయత్నించాను( సినిమా ఇంకా విడుదల కానందువల్ల సీన్స్‌లో జరిగిన మార్పులు, చేర్పులు గురించి చెప్పడానికి ఆయన ఇష్టపడలేదు). ఈ ప్రభావం షూటింగ్‌పై పడింది. సాధారణంగా ఏ సినిమా షూటింగ్‌లోనైనా మధ్యాహ్నం ఒంటిగంటకు భోజన విరామం. కానీ జై బోలో తెలంగాణ షూటింగ్‌లో మాత్రం పని పూర్తయ్యాకే తిండి. సెట్‌లో మూడ్ అలా ఉండేది. నటీ నటుల నుంచి లైట్‌మన్ వరకు అందరూ ఎంతగానో సహకరించారు. కె.సి.ఆర్ నుంచి గద్దర్ వరకు పాటల రచయితలందరూ పాటలు రాసిచ్చారు. ఒక్కోపాటకు ఒక్కో ప్రత్యేకత వుంది.

ఒకటి జీవితాన్ని చెబుతుంది. మరొకటి ప్రేమను, ఇంకో పాట దు:ఖాన్ని వెల్లడిస్తుంది. శ్రీకృష్ణకమిటీ నివేదిక రానే వచ్చేసింది. అందులో ఏమీ వుండదని ముందే అనుకున్నాను. ఆ విషయాన్ని కూడా సినిమా ద్వారా ముందుగానే చెప్పాలనుకున్నాను. కానీ సినిమా ఆ లోగా విడుదల చేయలేకపోయాను. 2010 మార్చి నుంచి నవంబరు వరకు షూటింగ్ కొనసాగింది. ఇవన్నీ దాటుకుంటూ చివరకు సెన్సార్‌బోర్డు గడపతొక్కినప్పుడు ఎదురైన అనుభవంతో ఊపిరాడలేదు.

****

కథ రాస్తున్నప్పుడు ఎన్ని వందల సార్లు ఏడ్చానో నాకే తెలుసు. సన్నివేశాలు తలచుకున్నప్పుడు కన్నీళ్లు ఆగేవికావు. సినిమా నిర్మాణానికి ఎన్నో కష్టాలు. ఇంకెన్నో ఆర్థిక ఇబ్బందులు. నా మొత్తం కెరీర్‌ను పణం పెట్టి తీసిన సినిమా ఇది. ఎలా చూసినా ఈ సినిమా నా జీవితం. నా భవిష్యత్ నిర్ణయించేది కూడా ఇదే. ఇవన్నీ ఎవరికీ చెప్పుకోలేనివి. ఆ తడి ఎన్నటికీ ఆరదు. ఆ ఫైర్ సినిమా జనంలోకి వెళ్లేదాకా ఆగదు. కానీ సెన్సార్‌బోర్డు సినిమా విడుదలకు నిరాకరించినపుడు నిలువెల్లా కంపించిపోయాను. ఎంతో మనస్తాపానికి గురయ్యాను. జై బోలో తెలంగాణ కేవలం సినిమా కాదు.

తెలంగాణ ఉద్యమానికి హృదయం. ఒక ఊపిరి. శ్వాస. దాన్నిప్పుడు ఆపేస్తున్నారు. ఏం చేయాలో తోచలేదు. ఎంతో మంది కళాకారులు, విద్యార్థులు, సంఘాలవాళ్లు వీళ్లంతా దన్నుగా నిలిచారు. లాయర్లు అరెస్టయ్యారు. సినిమా తీశాక నీ పని అయిపోయింది. మేమే చూసుకుంటాం అంటూ ధైర్యం చెప్పారు. కొందరైతే మరొకడుగు ముందుకువేసి ప్రింటులు పంపిస్తే థియేటర్స్‌లో ప్రదర్శిస్తామని ముందుకొచ్చారు. మొత్తానికి కొన్ని సీన్స్ తొలగింపుతో సెన్సార్‌బోర్డు ఎ సర్టిఫికెట్ ఇచ్చింది. నా గమ్యానికి కాస్త చేరువగా వచ్చాను. శుభం కార్డు పడటానికి మాత్రం ఇంకా సమయం వుంది.

****

సెన్సార్‌బోర్డు సభ్యులు మినహాయిస్తే జై బోలో తెలంగాణను చూసింది కె.సి.ఆర్ ఒక్కరే. సినిమాలో మూడు సీన్స్ దగ్గర ఆయన ఏడ్చేశారు. తెలంగాణ దు:ఖాన్ని చెప్పుకునే సినిమా ఇది. తన బాధను వెల్లడిస్తుంది. గుండెమీద కాలుతున్న కుంపట్లను చూపుతుంది. తన కష్టాలను చెప్పుకుంటుంది. అంతేగానీ ఎవరి మనసుల్నీ కష్టపెట్టదు. తన అవమానాల్ని కళ్లముందు పెడుతుంది. ఎవరినీ అవమానించదు. ఈ సినిమాకు ఆ అవసరం లేదు. ఒక మంచి సినిమాగా అందరినీ మెప్పిస్తుంది.

పూర్తిపేరు: నిమ్మల శంకర్
అమ్మానాన్న: గురవయ్య, సక్కుబాయమ్మ
కుటుంబం: భార్య మాధవి, ఇద్దరు పిల్లలు
చదువు: పాలిటెక్నిక్
దర్శకత్వం చేసిన సినిమాలు: ఇప్పటివరకు తెలుగులో ఆరు, కన్నడంలో ఒకటి
అవార్డులు: 2000 సంవత్సరంలో జయంమనదేరా సినిమా రెండు నందులు గెలుచుకుంది. వీటితోపాటు ఎపిసినీగోయర్స్ అసోషియేషన్ ప్రకటించిన అవార్డులు, మానిక్‌చందర్ ఫిల్మ్‌ఫేర్ అవార్డులు దక్కాయి.

- పరవస్తు లోకేశ్వర్

ప్రత్యేక తెలంగాణ ఉద్యమం షష్టిపూర్తి చేసుకున్నది. మూడు తరాల పోరాటం. మూడు దశలుగా కొనసాగుతున్న పోరాటం. దీని మూలాలు 1948 సెప్టెంబర్‌లో జరిగిన పోలీస్ యాక్షన్‌లో ఉన్నాయి. మిలటరీతోపాటు ఆంధ్ర ప్రాంతం నుండి వచ్చిన మద్రాసు ప్రభుత్వ ఉద్యోగులు, అధికారుల స్వార్థ పూరిత ధోరణులకు వ్యతిరేకంగా ఉద్యమ బీజాలు మొలకెత్తి 1952 సెప్టెంబర్ నాటికి ‘గైర్ ముల్కీ గోబ్యాక్’ మొదటి దశ ఉద్యమం ప్రారంభమై ఆ నాటి పోలీసు కాల్పులలో 18 మంది విద్యార్థులు, పౌరులు చనిపోయారు. ఈ మొదటి దశ ఉద్యమం 1956 నవంబర్ ఆంధ్రప్రదేశ్ అవతరణకు ముందే జరగడం గమనార్హం. ఆంధ్రప్రదేశ్ రాష్ట్రావతరణ జరిగిన తర్వాత 13 సంవత్సరాలకే 1969లో ‘జై తెలంగాణ’ ఉద్యమం పునఃప్రారంభమై, యావత్ తెలంగాణ అగ్నిగుండంగా మారి పోలీసు కాల్పులలో 370 మంది విద్యార్థులు, ప్రజలు అమరులైనారు. అది కూడా అనేకానేక కారణాల వలన చల్లబడి నివురు గప్పిన నిప్పులా మిన్నకుండి మళ్లీ 1995-96 ప్రాం తాలలో ‘ఫీనిక్స్’ పక్షిలా పునర్జన్మించింది. అదే నేటి తరం, మూడవ తరం పాల్గొంటున్న వర్తమాన పోరాటం.

జాతీయంగా చూసినా, అంతర్జాతీయంగా చూసినా తెలంగాణ పోరాటం ఒంటరి పోరాటం కాదు అస్తిత్వ పోరాటాల పరంపరలో అది అంతర్భాగం. ముందు ప్రపంచ పటం వైపు ఒకసారి దృష్టి సారిద్దాం. 1945లో రెండవ ప్రపంచ యుద్ధం ముగిసిన తర్వాత ఆసియా, ఆఫ్రికా ఖండాలలో అనేక దేశాలు స్వాతంత్య్రం సంపాదించుకున్నాయి. ఆయా జాతుల విముక్తి అనంతరం, వాటి ప్రత్యేకతలు, భిన్నత్వాల కారణంగా స్వాతంత్య్రానంతరం ఆ దేశాలలో ఉపజాతుల పోరాటాలు ప్రారంభమైనాయి. ఇవన్నీ అస్తిత్వ, ఆత్మగౌరవ, స్వాభిమాన, స్వయంపాలన ఉద్యమాలే. చారిత్రక, భౌగోళిక ప్రత్యేకతల వలన, భాషా సంస్కృతులు, ఆచార వ్యవహారాలు, ఆహారపు అలవాట్లు, జీవన విధానంలో భిన్నత్వం వలన ఈ ఉపజాతులు, ఉపశ్రేణులు ప్రత్యేక రాష్ట్ర లేక ప్రత్యేక దేశ నినాదాలతో ఉద్యమాలు ప్రారంభించాయి.

ప్రపంచ చరిత్ర పరిణామక్రమంలో ఇదొక అనివార్య దశ. యూరప్ ఖండంలోని యుగోస్లావియా దేశంలోని సెర్బియా, కొసావో పోరాటాలు, రష్యాలో చెచెన్యా ఉద్యమం మొదలుకొని ఆసియా ఖండంలో అతిపెద్ద దేశమైన చైనాలో టిబెట్, దక్షిణ చైనాలోని కాష్గర్, ఉర్మిక్, గోల్ముడ్ ప్రాంతాలలో జరుగుతున్న ఉద్యమాలు, శ్రీలంకలో తమిళుల ఉద్యమాలు, పాకిస్థాన్‌లో వజీరిస్థాన్, ఫక్తూనిస్థాన్, బెలూచిస్థాన్ పోరాటాలు, మధ్య ఆసియాలో కిర్గిజ్ జాతి ప్రజలకు ఉజ్జెక్ జాతి ప్రజలకు మధ్య జరుగుతున్న ఘర్షణలు వంటివన్నీ జాతులు ఉపజాతుల మధ్య అస్తిత్వం, ఆత్మగౌరవం, స్వయంపాలన, సహజ వనరులపై ఆధిపత్యం కోసం జరుగుతున్న ఉద్యమాలే. ఈ విశాల విశ్వదృష్టి నుంచి ప్రత్యేక తెలంగాణ ఉద్యమాన్ని పరిశీలించాల్సి ఉంది.

ప్రస్తుతం మన దేశంలో తెలంగాణతో సహా విదర్భ, బుందేల్‌ఖండ్ హరితప్రదేశ్, కూచ్ బిహార్, గూర్ఖాలాండ్ తదితర ప్రాంతాలు ప్రత్యేక రాష్ట్రాల కోసం ఉద్యమిస్తున్నాయి. ఇవేవీ దేశం నుండి విడిపోయే ఉద్యమాలు కాకపోగా రాజ్యాంగ పరిధిలో, చట్టబద్ధంగా, ప్రజాస్వామ్య పద్ధతులలో నడుస్తున్న శాంతియుత పోరాటాలు. వీటిని జాతీయోద్యమానికి కొనసాగింపుగా మాత్రమే పరిగణించాలి. భారత రాజ్యాంగం పీఠికలో రాజ్యాంగ నిర్మాతలు పేర్కొన్న ఆశయాలు, లక్ష్యాలు ‘న్యాయం, స్వేచ్ఛ, సమానత్వం, ప్రతి వ్యక్తికి గౌరవం’ ఆచరణలో అందనందువల్లే, వాటిని సాధించుకునేందుకు ఈ ఉద్యమాలు ఆవిర్భవించి ఇంకా కొనసాగుతున్నాయి. తెలంగాణ ఉద్యమం కీలకమైన దశకు చేరుకున్న వర్తమాన సందర్భంలో జాతీయోద్యమం అనుభవాలు, గుణపాఠాల నేపథ్యంలో అధ్యయనం, పరిశీలన తప్పనిసరి.

జాతీయోద్యమంలో ‘కాంగ్రెస్ పార్టీ’ పాత్రను ముందు పరిశీలిద్దాం. నిజానికి కాంగ్రెస్ 1885లో ఆవిర్భవించి నాటి నుండి 1947లో స్వాతంత్య్రం సాధించేదాకా పేరుకు ఒక రాజకీయ పార్టీగా కనబడినా ఆచరణలో ‘విభిన్న భావాలు కలవారిని కలుపుకుని ఒక విశాలమైన ప్రజావేదిక’గా పని చేసింది. దాని ఏకైక లక్ష్యం ‘స్వాతంత్య్రం’. అందుకే జాతిపిత గాంధీజీ స్వాతంత్య్రం రాగానే కాంగ్రెస్‌ను రద్దుచేసి అందరూ తమతమ రాజకీయ ఆర్థిక సిద్ధాంతాలకు అనుగుణంగా రాజకీయ పార్టీలను ఏర్పాటు చేసుకోవాలని సూచించారు. కానీ ఎవరూ ఆ సలహాను పాటించక, కాంగ్రెస్ గొప్పతనాన్ని, ఘనమైన చరిత్రను వదులుకునే ఇష్టంలేక ఒక రాజకీయ పార్టీగా దాని రూపుమార్చారు. ఏదేమైనా 1947 ఆగస్టు 15 వరకు కాంగ్రెస్ ఒక ‘విశాలమైన ఉద్యమ వేదిక’ మాత్రమేనన్నది మనం మననం చేసుకోవలసిన చారిత్రక వాస్తవం.

ఈ అనుభవం ప్రాతిపదికగా తెలంగాణ ఉద్యమాన్ని కూడా వివిధ రాజకీయ పార్టీల ఆధ్వర్యంలో ఎవరికి వారే విడివిడి ఉద్యమాలుగాగాక, ఒక విశాలమైన ప్రజావేదికను నిర్మించి అందరినీ కలుపుకుని భౌగోళిక తెలంగాణ సాధనే ఏకైక లక్ష్యంగా ప్రకటించి ఉమ్మడి ప్రజా ఉద్యమాన్ని కొనసాగించాలి. ఇటువంటి ఐక్య ఉద్యమానికి సీమాంధ్ర ప్రజలు, మేధావుల మద్దతును కూడగట్టాలి. రాజకీయ పార్టీలకు అతీతంగా ‘తెలంగాణ సాధన’ సమష్టి లక్ష్యంగా ఏకతాటిగా పని చేయాలి. ఇది ప్రప్రథమంగా జాతీయోద్యమం నుండి నేర్చుకోవాల్సిన గుణపాఠం.

ఇక రెండవ అంశం- ఉద్యమ స్వభావం.

ఏ దేశంలోనైనా, ఏ ఉద్యమం లోనైనా ఉద్యమాన్ని నిర్వహించే నాయకత్వ స్వభావమే ఉద్యమ స్వభావంగా స్థిరపడుతుంది. ఆ నాయకత్వపు వర్గ ప్రయోజనాలే ఉద్యమ స్వభావాన్ని నిర్ణయిస్తాయి. జాతీయోద్యమ నాయకత్వం మన దేశపు భూస్వామ్య, పెట్టుబడిదారుల ప్రయోజనాలకు ప్రాతినిధ్యం వహించింది కాబట్టే, స్వాతంత్య్రానంతరం అరవై సంవత్సరాలు దాటినా స్వాతంత్య్ర ఫలాలు, ఫలితాలు అట్టడుగు పేదలకు అందటం లేదు. స్వాతంత్య్రోద్యమంలో ప్రజలు క్రింది స్థాయిలో విస్తారంగా పాల్గొని త్యాగాలు చేసినా నాయకత్వపు స్థాయిలో వారికి ఆనాడు ప్రాతినిధ్యం లేనందున ఈ నాటికీ సామాన్య ప్రజలకు ఆ ఫలాలు అందటం లేదు.
ఈ లోపం వర్తమాన తెలంగాణ ఉద్యమంలో పునరావృతం కారాదు. ప్రజల నాయకత్వంలోనే ప్రజా ఉద్యమం నడిచినపుడు, వారికి ప్రాతినిధ్యం వహించే శక్తులు రేపటి నూతన తెలంగాణలో అధికారం చేపట్టినపుడు మాత్రమే అట్టడుగు వర్గాల ప్రజల ఆర్థిక సామాజిక స్థితిగతులలో మౌలికమైన మార్పులు సంభవిస్తాయి. లేకపోతే రేపటి నాడు ఒకవేళ తెలంగాణ రాష్ట్రం సిద్ధించినా ‘కొత్త సీసాలో పాత సారా’ పరిస్థితే కొనసాగుతుంది.

మూడవ పాఠం

జాతీయోద్యమం నుంచి నేర్చుకోవాల్సిన మూడవ పాఠం ప్రత్యామ్నాయ ఉద్యమాల ఆవశ్యకత. కాంగ్రెస్ పార్టీ ప్రధాన స్రవంతి ఉద్యమానికి నాయకత్వం వహించినా ప్రత్యామ్నాయ ఉద్యమాలు దేశంలో బలంగా ముంచుకొచ్చాయి. ఇవి ఆరోగ్యకరమైన పరిణామాలకు దారితీశాయే తప్ప జాతీయోద్యమాన్ని బలహీనపరచలేదు. 1905 నాటికే కాంగ్రెస్‌లో అతివాదులు, మితవాదులు భిన్న శిబిరాలకు ప్రాతినిధ్యం వహించారు. 1905 బెంగాల్ విభజనతో ప్రారంభమైన ‘వందేమాతరం’ ఉద్యమం ఒకవైపు, మరోవైపు ‘జుగాంతర్’, ‘అనుశీలన సమితి’ లాంటి అతివాత విప్లవ సంస్థలు ముందుకొచ్చాయి. 1921లో చౌరీచౌరాలో హింసాత్మక సంఘటనలు జరిగిన ఫలితంగా బ్రహ్మాండంగా కొనసాగుతున్న సహాయ నిరాకరణోద్యమాన్ని గాంధీజీ హఠాత్తుగా ఆపినప్పుడు నిరాశకు గురైన ప్రజలు ఉగ్రవాద కార్యకలాపాల వైపు మళ్లారు. భగత్‌సింగ్, రాజ్‌గురు, సుఖ్‌దేవ్, చంద్రశేఖర్ ఆజాద్‌లు రంగంపైకి వచ్చారు. 1925లో భారత కమ్యూనిస్టు పార్టీ, 1934లో కాంగ్రెస్ సోషలిస్టు పార్టీ ఉనికిలోకి వచ్చి స్వాతంత్య్రోద్యమానికి చోదక శక్తులుగా పని చేశాయి.

1969 నాటి రెండవ దశ తెలంగాణ ఉద్యమంలో విద్యార్థులు, ప్రజలు ప్రాణత్యాగం చేసిన సంగతి తెలిసిందే. కానీ ప్రస్తుత మూడవ దశలో దాదాపు 400 మంది ఆత్మహత్యలు చేసుకున్నారు. ఇదొక విషాదకర పరిస్థితి. జాతీయోద్యమంలో నిరాశా నిస్పృహలకు ప్రజలు గురైనా ప్రత్యామ్నాయ మార్గాలను ఆవిష్కరించుకున్నారే తప్ప ఆత్మహత్యలకు పాల్పడలేదు. కానీ, వర్తమాన తెలంగాణ ఉద్యమంలో ఈ ఆత్మహత్యలు ఎందుకు జరుగుతున్నట్లు? ఇది ఏ రకమైన అమరత్వం? ఏ విధమైన వీరత్వం? దీన్ని కచ్చితంగా తెలంగాణ ఉద్యమ వైఫల్యంగానే లెక్క వేయాలి. ఉద్యమ నాయకత్వం విద్యార్థులకు యువజనులకు ఇంకా సంపూర్ణ విశ్వాసాన్ని, నమ్మకాన్ని, భరోసాను కలిగించకపోవడంవల్లే ఆటు పోట్లకు, నిరాశా నిస్పృహలకు గురై తమ ఆగ్రహాన్ని, నిరసనను ఆత్మహత్యల ద్వారా వ్యక్తం చేస్తున్నారు. వీరి తెలివితేటల్ని, శక్తియుక్తులను సాహసాల్ని నిర్మాణాత్మక ఉద్యమం వైపు మళ్లిస్తే ఈ ఆత్మహత్యలు జరగకపోయేవి. ప్రత్యామ్నాయ శక్తులు చీలికలు పేలికలుగా ఉండటం, ఒక బలమైన పాయగా లేకపోవటం, దానికి బలమైన నాయకుడు కొరవడటం ఈ దుస్థితికి దారితీసింది. తెలంగాణ సాధనకే కాదు సాధించుకున్న తెలంగాణను ఆదర్శమైన తెలంగాణగా పునర్నిర్మించుకోవటం కోసం కూడా ప్రత్యామ్నాయ ఉద్యమం, ఉద్యమ శక్తులు అవసరం.

జాతీయోద్యమాన్ని సమగ్రంగా అధ్యయనం చేసి ఆ అనుభవాల వెలుగులో ప్రత్యేక తెలంగాణ ఉద్యమాన్ని విజయపథం వైపు నడిపించాల్సిన గురుతర బాధ్యత సమకాలీన సంక్లిష్ట సన్నివేశంలో తెలంగాణ ఉద్యమ రథ సారథులపై ఉంది.

- పరవస్తు లోకేశ్వర్
కన్వీనర్, తెలంగాణ రచయితల జేఏసీ

ఉద్యమ నాయకత్వ మూల స్వభావమే ఉద్యమ స్వభావంగా నిర్ణయించబడి దానికి అనుగుణంగానే ఉద్యమ స్వరూపం కూడా రూపొందుతుంది. ఉద్యమ నాయకత్వ మూలస్వభావానికి ఆధారం వారి సామాజిక, ఆర్థిక వర్గ ప్రయోజనాలు. ఈ కోణం నుంచే టిఆర్ఎస్ అధినేత కేసీఆర్ ప్రకటన- ‘ఈ గడ్డ మీద పుట్టిన ప్రతి బిడ్డకూ అన్ని రకాల ఉద్యోగాలకూ, పదవులకూ అవకాశం ఉంటుంది’ అన్నది పరిశీలించాలి.

ఈ ప్రకటన ఉపరితల ఉద్దేశ్యం ముల్కీ నిబంధనలు, ఉద్యోగాలకు సంబంధించినదిగా కనిపించవచ్చు. కానీ దాని వెనుక లోలోతుల్లో రాబోయే తెలంగాణ రాష్ట్రంలో రాజకీయ, ఆర్థిక రంగాల్లో కూడా సీమాంధ్ర సంతతికి, వారి వారసులకు అవకాశాలు ఉంటాయనే సంకేతం ఇస్తూ, వారి కోసం స్నేహ హస్తాన్ని చాచడం కనిపిస్తుంది. గతంలో అనేక సందర్భాలలో కేసీఆర్ ‘తెలంగాణ రాష్ట్రం ఏర్పడిన తరువాత సీమాంద్రులు పరిశ్రమలు, వ్యాపారాలు, ఆర్థిక లావాదేవీలు కొనసాగించవచ్చు’ అంటూ హామీ ఇవ్వడాన్ని ఈ సందర్భంగా గుర్తు చేసుకోవాలి.

ఇక ఇప్పుడు పరిశ్రమల సి.ఇ.ఒ.లతో సమావేశమే కానీయండి లేదా ఆయన పుత్రుడు కె.టి.ఆర్. సీమాంధ్ర వారితో తనకు గల వ్యాపార భాగస్వామ్యం గురించి వెల్లడించడమే కానీయండి జాగ్రత్తగా పరిశీలిస్తే రాబోయే తెలంగాణ రాష్ట్రంలో భూస్వామ్య అవశేష వర్గాల వారు సీమాంధ్ర నియోరిచ్ పెట్టుబడిదారులతో చేతులు కలిపి అన్ని రకాల పరిశ్రమలు, వ్యాపారాలతో సహా ప్రభుత్వంలోనూ, చట్టసభల్లోనూ భాగస్వాములు అవుతారని సూచనప్రాయంగా తెలుస్తుంది. ఆ ‘అపవిత్ర కలయిక’కు తెలంగాణ ప్రజల్ని మానసికంగా సిద్ధం చేస్తున్నారు.

సీమాంధ్ర పెట్టుబడిదారులు, వ్యాపార వర్గాల వారు కూడా తెలంగాణ రాష్ట్రం విషయంలో మానసికంగా సిద్ధమైనారు. అయితే హైదరాబాద్‌లో తమ ఆస్తుల్ని ఎలా కాపాడుకోవాలి, ఎలా వ్యాపారాలను కొనసాగించాలనేదే వారి ముందున్న ‘లక్ష వరహాల ప్రశ్న’. మాయల ఫకీరు ప్రాణం చిలుకలో దాగున్నట్టు వారి ఆర్థిక మూలాలన్నీ హైదరాబాద్‌లోనే ఉన్నాయి. అందువల్ల వారి ముందు రెండు ఆలోచనలు ఉన్నాయి. ఒకటి- హైదరాబాద్ నగరాన్ని కేంద్ర పాలిత ప్రాంతంగా లేదా దేశ రెండవ రాజధానిగా ప్రకటింపచేసి తమ ఆర్థిక ప్రయోజనాలను కొనసాగించడం.

అది సాధ్యం కాకపోతే రెండవది- రాబోయే తెలంగాణలో అధినాయకులు, వారి అనుయాయులతో కలిసి ఉమ్మడి భాగస్వాములుగా కొత్త పరిశ్రమలను, వ్యాపారాలను కొనసాగించడం. ఈ దూరాలోచనతోనే ఇటీవలి కాలంలో రెండు వైపుల నుంచి ప్రేమ సంకేతాలు, మైత్రి సందేశాలు వెలువడుతున్నాయి. ఈ మిలాఖత్తు నిజంగానే సాధ్యమైతే రాజకీయంగా, భౌగోళికంగా తెలంగాణ స్వప్నం సాకారమైనా ఆర్థిక, సామాజిక పొరలలో ఏ విధమైన మౌలిక మార్పులు సాధించక ‘కోత్త సీసాలో పాతసారా’ కొనసాగుతుంది.

భారత దేశ అర్ధరాత్రి స్వాంతంత్య్రం, అర్ధస్వాతంత్య్రం పాతకథ తెలంగాణ రాష్ట్రంలో కొత్తగా పునరావృతమవుతుంది. అరవై ఏళ్ల స్వాతంత్య్ర ఫలాలు పేదలకు అందనట్లే తెలంగాణ రాష్ట్రంలో కూడా జరగవచ్చు. వేదిక మారినా నాటకం మాత్రం పాతదే సాగుతుంది. అవే కార్పొరేట్ ఆసుపత్రులు, అవే విద్యాసంస్థలు, తెలంగాణ ప్రజల్ని పరిహసించే అవే సినిమాలు, అవే రియల్ ఎస్టేట్ బిజనెస్‌లు, పరిశ్రమలు, కాంట్రాక్టులు ఉంటాయి.

పైగా ఇక్కడ పుట్టిన బిడ్డలుగా రాజకీయ రంగంలో, ప్రభుత్వంలో కొనసాగి ప్రభుత్వ విధానాల రూపకల్పనను, అమలును సీమాంధ్ర ప్రయోజనాలకు అనుకూలంగా ఉండేటట్లు ప్రభావితం చేస్తారు. కర్ణాటకలో ‘గాలి సోదరుల’ పెట్టుబడి అక్కడి ప్రభుత్వాన్ని , రాజకీయాలను ఎట్లా శాసిస్తున్నదో ఈ సందర్భంలో మనం మననం చేసుకోవాలి. హైదరాబాద్‌లో స్థిరపడిన సీమాంధ్ర వ్యాపారాలు, పరిశ్రమల ముందు ఔత్సాహిక తెలంగాణ వారి వ్యాపారాలు, పరిశ్రమలు మొగ్గదశలోనే మాడి మసి అవుతాయి. తెలంగాణ ప్రాంతీయ పెట్టుబడి ఆవిర్భావానికి, అభివృద్ధికి అవకాశాలు ఉండవు.

ఒకవేళ ఇది పొరపాటు అంచనా, ఆలోచన అయినట్టయితే ఈ నాటికి కూడా తెలంగాణ ఉద్యమ నాయకత్వం సీమాంధ్ర ఆర్థిక కార్యకలాపాలపై ‘ఆర్థిక దిగ్బంధనాల్ని’ ఎందుకు విధించలేదు? గతంలో గాంధీజీ చేపట్టిన ‘విదేశీ వస్తు బహిష్కరణ’ స్థాయిలో సీమాంధ్ర ఉత్పత్తులను , విద్యాసంస్థలను, సినిమాలను ఎందుకు బహిష్కరించలేదు? ఏదో ఒకటి రెండు బహిష్కరణలకు పిలుపు ఇచ్చినా వెంటనే ఉపసంహరించుకుని ‘ఘర్షణ, ఐక్యత వెరసి స్వప్రయోజనాలు’ అన్న దళారీ మనస్తత్వాన్ని ఎందుకు ప్రదర్శించింది? ఈ తెరవెనుక రాజీలు, లౌక్యాలు భవిష్యత్తులో పడబోయే లాలూచీలకు పునాదులు కావా?

ఇక నైతిక విలువల సంగతి. ఉద్యమ నాయకత్వపు ఉన్నత స్థానాలలో ఉన్నవారే అవతలి పక్షం వ్యాపారాలలో భాగస్వాములు కావడం తెలంగాణ ప్రజల మనస్సులను గాయపరచడం కాదా? ఏ పెట్టుబడి తెలంగాణను దోపిడీకి, అన్యాయానికి గురి చేసిందో అదే పెట్టుబడిలో భాగస్వాములుగా మారడం ఏ విలువలకు సంకేతం? ఆత్మహత్య చేసుకున్న విద్యార్థులపై ఏ మాత్రం ప్రేమ, గౌరవం ఉన్నా వెంటనే అటువంటి వ్యాపార భాగస్వామ్యాల నుంచి బయటకు వచ్చి సీమాంధ్ర వస్తూత్పత్తులపై ఆర్థిక దిగ్బంధాన్ని, బహిష్కరణను విధించాలి.

ప్రారంభంలో ఆటుపోట్లు, కష్టనష్టాలు ఎదురైనా లెక్కచేయక నూతన తెలంగాణ రాష్ట్రాన్ని ఆర్థిక స్వావలంబనతో, తన కాళ్ళపై తాను నిలబడి, యావత్ దేశానికే దీపస్తంభంగా నిలుపుతామని ఉద్యమ నాయకత్వం తెలంగాణ ప్రజలకు హామీ ఇవ్వాలి.

- పరవస్తు లోకేశ్వర్
తెలంగాణ రచయితల జెఎసి కన్వీనర్

సిరిపురం యాదగిరి (యాదయ్య) ఉస్మానియా విశ్వవిద్యాలయ ప్రవేశద్వారం వద్ద ఫిబ్రవరి 20న ఉదయం పెయికి అగ్గి అంటించుకొని ఆత్మహత్యాయత్నం చేశారు. తెలంగాణ కోసం ఆత్మహత్యాయత్నం చేసుకొంటున్నానని సూసైడ్‌ నోట్‌లో విస్పష్టంగా పేర్కొన్నాడు. అతనిని ఆసుపత్రికి తరలించారు. సాయంత్రం పొద్దు పోయాకా యాదయ్య చనిపోయారు. అదేరోజు అర్ధరాత్రి యాదయ్య మాతృదేహాన్ని ఆయన స్వగ్రామం నాగారం (మహేశ్వరం మండలం) తరలించి వారి ఆచారం ప్రకారం బొందపెట్టారు. తెలంగాణ గ్రామాల్లో పెళ్ళికాని యువతి, యువకులు చనిపోతే బొందపెట్టడం ఆచారం. యాదయ్య చావు ఆచారం ప్రకారమే జరిగిందంటే ఇందులో చర్చించడానికి గాని, ఆశ్చర్యపోవడానికిగాని ప్రత్యేక వ్యాసం రాయడానికిగాని ఏమీ ఉండదు. కాని అలా జరగలేదు. పోలీసులు వారిదైన వ్యూహాత్మక దోరణిని ప్రదర్శించారు.

యాదయ్య ఆత్మహత్య చేసుకోవడానికి కారణాలను తర్వాత విశ్లేషిద్దాం. ఆత్మహత్యాయత్నం దగ్గర నుండి ఏం జరిగిందో చూద్దాం. యాదయ్య ఆత్మహత్యాయత్నం చేసుకొన్నది యూనివర్సిటి గేట్‌ ముందు. వెంటనే 108 వాహనం వచ్చింది. సాధారణంగా ఇలాంటి సందర్భాల్లో సమీప ఆసుపత్రికి పేషెంటును తీసుకెళ్తారు. ప్రక్కనే అరకిలోమీటరు దూరంలో మమిళా సభ ఆసుపత్రి ఉంది. యూనివర్సిటి అవతలి గేట్‌ దగ్గర ఆర్‌టిసి వారి ఆసుపత్రి ఉంది. రెండు, మూడు కిలోమీటర్ల దూరంలో ఒకవైపు ఉస్మానియా ఆసుపత్రి ఉంది. ఇంకోవైపు గాంధీ ఆసుపత్రి ఉంది. మొదట గాంధీ ఆసుపత్రికి తీసుకెల్తున్నాం అని, ఎక్కడో సాగర్‌ రింగ్‌రోడ్‌ దగ్గర సైఫాబాద్‌ అవతల వున్న డిఆర్‌డిఎల్‌ అపోలో ఆసుపత్రికి యాదయ్యను ఎందుకు తరలించినట్లు? సాయంత్రం యాదయ్యను చూడడానికి హోం మంత్రి సబితాఇంద్రారెడ్డి వచ్చింది. అక్కడ ఉన్న తెలంగాణవాదులు కొందరు ఆమెను నిలదీశారు. ”ఏమిటీ అన్యాయం, ఎన్ని ఆత్మహత్యలు జరుగుతున్నా మీరు పట్టించుకోరా. మీ మంత్రి పదవులే మీకు కావాలా, తెలంగాణ వద్దా” అని వారు అడిగారు. దీంతో ఆవిడ కోపంతోనే అక్కడి నుండి నిష్క్రమించారు. సబితను ప్రశ్నించిన పిరోజ్‌ఖాన్‌ అనే కరీంనగర్‌ విద్యార్థి పోలీసుల చేతిలో పడి సోమవారం సాయంత్రందాక ఆచూకి లేకుండా పోయారు. 20వ తేదీన సాయంత్రం పొద్దు పోయాక యాదయ్య మరణించారు. యాదయ్య మరణ వార్తను సీమాంధ్ర యాజమాన్యంలో ఉన్న మీడియా సహజంగానే పెద్ద ప్రాముఖ్యత ఇవ్వలేదు. హిందూ దినపత్రికలో మాత్రం ఈ వార్త ప్రముకంగా వచ్చింది. సాక్షితో పాటు ఒకటి రెండు పేపర్లలలో ఈ వార్తను ప్రచురించారు. ఆంధ్రాజ్యోతిలో యాదయ్య వార్త లేనే లేదు. సరే అది మీడియా ఎప్పుడూ చూపే వివక్షతనే. ఆయన స్వయంగా అంటించుకున్నాడా, ఇతరులెవరైనా అంటించారా లాంటి అర్థంలేని ప్రశ్నలు అడిగినచో మీడియా ప్రతినిధిని విద్యార్థులు కొట్టినంత పనిచేశారు. వైష్ణవి కిడ్నాప్‌పై స్పందించినట్లుగా యాదయ్య పట్ల మీడియా స్పందించకపోవడంలో వారి వైఖరి తేటతెల్లం అవుతున్నది. అది అలా ఉండగా పోలీసులు ఈ ఘటనలో పరమ దుర్మార్గంగా, అనైతికంగా, చట్టవిరుద్దంగా ప్రవర్తించారు.

సాధారణంగా ఒక వ్యక్తి ఎంతగా కాలినా ఆ గాయాలతో 24 గంటల తర్వాతనే మరణిస్తారు. కాని యాదయ్య 12 గంటలు గడిచి గడవగానే మరణించారు. కారణం తెలువదు. యాదయ్య బ్రతికితే అతను బాగుపడి బయటికి రావడానికి కనీసం రెండు నెలలు అయినా పడుతుంది. ఈ రెండు నెలలు ఆసుపత్రి ముందు టెంట్లు వేసి దీక్షలు చేసి నానా హడావిడి చేస్తారు. నాయకులు పరామర్శించడానికి వస్తారు. దీంతో మీడియా వారి హడావుడి, ఉద్యమకారులగోల ఇవన్నీ ఎందుకని ముందుగానే గుట్టుచప్పుడు కాకుండ ‘యాదయ్య కథకు ఆ రాత్రి ముగింపు పలికితే ఏ గొడవా ఉండదు కదా’ అని పోలీసులు భావించి ఉండవచ్చు. లేదా యాదయ్యనే కాలిన గాయాలతో మరణించి ఉండవచ్చు. అటువంటప్పుడు యాదయ్య శవాన్ని గుట్టుచప్పుడు కాకుండా ఎందుకు తరలించినట్లు? మీడియా వారికి ఎందుకు ఎరుక పరచనట్లు? సాధారణంగా ఎవరైనా ఇలా కాలిన గాయాలతో ఏ ఆసుపత్రిలో మరణించినా పోస్ట్‌ మార్టం చేయడానికి శవాన్ని ఉస్మానియా ఆసుపత్రికి తరలిస్తారు. సాక్షాత్తు ముఖ్యమంత్రి చెప్పినా రాత్రికి రాత్రి పోస్ట్‌మార్టం చేయరుగాక చేయరు. మరి యాదయ్యను రాత్రికిరాత్రి ఆయన స్వంత ఊరికి ఎలా తరలించారు. పోలీసులకు ‘ఈ ఆలోచన’ ముందే ఉంది కాబట్టే యాదయ్యను ఆయన స్వగ్రామానికి వెళ్ళే దారిలో ఉన్న డిఆర్‌డిఎల్‌ ఆసుపత్రికి తీసుకెళ్ళారు. అటునుంచి అటే శవాన్ని మూడో కంటికి తెలియకుండా తరలించారు. 85% కాలిన శరీరంతో ఎలాగు చనిపోయే వాడేకదా అని ముందే ‘ఆ పనికానిచ్చే’ అవకాశం ఉంది. ఈ విషయమై తెలంగాణ వాదులకు తీవ్రమైన అనుమానాలున్నాయి. ఈ ఉద్దేశ్యం ఉంది కాబట్టి యాదయ్యను పోలీసులు డిఆర్‌డిఎల్‌ అపోలో ఆసుపత్రికి తరలించారు అన్నది వారి ఆరోపణ.

యాదయ్య ఎందుకు ఆత్మహత్యకు ఒడిగట్టాడు:

యాదయ్యకు రాజకీయాల పట్ల ఆసక్తి ఉంది. కె.సి.ఆర్‌, సబిత, చంద్రబాబు, తదితరులతో యాదయ్య దిగిన పోటోలు, ఆ విషయాన్ని వెల్లడిస్తున్నాయి. ఆ పోటోలను మార్కుల మెమోలను ఆయాయ గుర్తుగా ఆత్మహత్యాస్థలంలో వదిలాడు. తెలంగాణా విషయంలో రాజకీయ వాదులు చేసిన చేస్తున్నా మోసాలు యాదయ్యకు అర్థమై ఉంటాయి. మిత్రులందరితో కలిసి ”చలో అసెంబ్లీ” కార్యక్రమానికి వద్దామని చెప్పిన యాదయ్య ఆ రోజు ఉదయం ఒక్కడే బయలుదేరి వచ్చాడు. ఆ ముందు రోజు రాత్రి కె.సి.ఆర్‌ లాంటి నాయకులు అసెంబ్లీ ముట్టడి కార్యక్రమం వద్దని విద్యార్థులను నిరుత్సాహపర్చిన సంగతి తెలిసి ఉంటుంది. ఎబివిపి, బిజెపి నాయకులందరు ఎవరికి వీలయిన రీతిలో వారు మాట్లాడటం వల్ల తీవ్ర నిరుత్సాహానికి, నిరాశకు గురయినందునే యాదయ్య ఆత్మహత్యకు ఒడిగట్టాడు. తెలంగాణ రాదనే నిరాశనే యాదయ్యను, ఆత్మహత్యాయత్నానికి పురికొల్పింది. రాజకీయాలపై అంతో ఇంతో అవగాహన ఉన్న యాదయ్య నిరాశతోనే ఆత్మహత్య చేసుకున్నారు. యాదయ్యను యాదయ్య తరాన్ని చావనిచ్చి, చంపి తెలంగాణాను తాత్కాలికంగా ఆపినా ముందుతరం వారు కూడా యాదయ్యలా చస్తారని చెప్పడానికి ఆస్కారం లేదు. యాదయ్య వెనక ఉన్నా ఈ తరం వారు ఇంకోరకంగ రియాక్ట్‌ కారని చెప్పడానికి ఎంతమాత్రం వీలు లేదు.

ఇక యాదయ్య గ్రామం సిరిపురానికి మూడే దారులున్నాయి. ఇందులో రెండు దారులు తారురోడ్డువి. ఈ రెండు దారులను పోలీసులు మూసేశారు. ఆబిడ్స్‌లో ట్రాఫిక్‌ కంట్రోల్‌ చేయడానికి వాడే బారికేడ్లతో సిరిపురం రోడ్లను పోలీసులు మూసేశారు. ఈ బారికేడ్లు సిరిపురంకు ఎలా వెళ్ళాయి? ఊరి నిండ పోలీసులు నిండారు. టీ షర్టులు వేసుకొన్న 20-25 ఏళ్ళ వయసున్న పోలీసులు, కర్నాటక పోలీసులు, సీమాంధ్ర పోలీసులు ఆ ఊరిని స్వాధీనం చేసుకొని, యాదయ్య బంధువులను అదిలించి బెదిరించి యాదయ్య శవాన్ని హడావిడిగ బొందపెట్టేశారు. మీడియా వారిని కూడా వెళ్ళనివ్వలేదు. వెళ్ళిన ఒకరిద్దరు కెమెరాల వారిని అదుపుచేసి బొంద పెట్టే వార్తా దృశ్యాలను అదుపు చేసి ఉంటారు లేదా పోలీసు వారికి ఇబ్బంది లేనివిధంగా చిత్రీకరించుకోనిచ్చి ఉంటారు. విమర్శకులకు సమాధానం చెప్పడానికి అన్నట్లు గద్దర్‌, హరీష్‌, తీగలకృష్ణారెడ్డి లాంటి వారిని ముగ్గురిని అనుమతించారు. పోలీసులు ఇంత దుర్మార్గం ఎందుకు చేస్తున్నారు? క్రింది పోలీసులు వారంతట వారుగ ఇలాంటి పనులు చేయరు. వారికి ఇలాంటి ఆదేశాలు ఇస్తున్నవారెవరు? ఈ ఆదేశాలు ఇస్తున్నవారిని ప్రోత్సహిస్తున్నవారెవరు?

మొత్తం మీద పోలీసులు ఏ అవాంఛనీయ సంఘటనలు జరగకుండా యాదయ్య శవాన్ని బొందపెట్టేశారు. యాదయ్య శవంతో పాటు తెలంగాణ సమస్యను బొందపెట్టేశం అని కించిత్తు గర్వంగా ఊపిరి పీల్చుకొని ఉంటారు. పోలీసు మంత్రి సబిత, ముఖ్యమంత్రి రోషయ్యలు ఈ విషయాన్ని గమనించనట్లే ఉండిపోయారు?

ఇలా శనివారం ఉదయం పెట్రోలు పోసుకొని ఆత్మహత్యాయత్నానికి పాల్పడిన యాదయ్య రాత్రికి శవమయ్యాడు. ఆధివారం ఉదయం దాదాపు అదేవేళకు బొందపెట్ట బడ్డాడు. అతి సాధారణ రీతిలో, అసాధారణ పోలీసుల బలగాల మధ్య అంత్యక్రియలు జరిగాయి. యాదయ్య నక్సలైట్‌ కాదు కాబట్టి మానవహక్కుల సంఘాలు యాగిచేయవు. యాదయ్య అగ్రకులం వాడుకాదు కాబట్టి వారి కనుసన్నల్లో మెదిలే మీడియా, ప్రజా సంఘాలు ఏమీ మాట్లాడవు. యాదయ్య టి.ఆర్‌.ఎస్‌ నాయకుడు కాదు కాబట్టి వారు ఏమీ మాట్లాడరు.

యాదయ్య తెలంగాణ కోసం ఆత్మార్పణ చేసుకున్నారు. అతని అంత్యక్రియలు కెసిఆర్‌, జయశంకర్‌, కోదండరాం, దామోదర్‌రెడ్డి లాంటి నాయకులు వేసే మొదటి పిడికెడు మట్టితో మొదలుకొని తెలంగాణ విద్యార్థులందరూ వేసే తలో పిడికెడు మట్టితో జరగాలి. అలా వేసిన మట్టి గుట్టగా ఏర్పడాలి. అది జహంగీర్‌ దర్గాలాగా తెలంగాణ వారందరికి పుణ్యక్షేత్రం కావాలి. పాపం యాదయ్య అనామకంగా కొండంత త్యాగానికి పిడికెడు మట్టిని పిసరంత గౌరవానికి కూడా నోచుకోలేదు. తప్పుచేసిన పౌరుడివలే పోలీసుల పహరాలో కననంఅయ్యాడు. యాదయ్య క్షమించు నీ త్యాగానికి దైర్యానికి తగిన చావును నీకు చేయలేకపోయాం!

• Also Read యాదన్నా!!! ఇది ముమ్మాటికి తప్పురా… : శ్రీనివాస్ రెడ్డి కొంపల్లి

Please take some time to read these news clippings from 9 Telangana districts about happenings on one single day – 28th Jan 2010. I am sure you will feel elated to see how rural Telangana is resounding with the slogans of ‘Jai Telangana’.

Mahabubnagar: http://picasaweb.google.com/konatham.dileep/MahabubNagar28012010?feat=directlink
Karimnagar: http://picasaweb.google.com/konatham.dileep/KarimNagar28012010?feat=directlink
Nizamabad: http://picasaweb.google.com/konatham.dileep/Nizamabad28012010?feat=directlink
RangaReddy: http://picasaweb.google.com/konatham.dileep/RangaReddy28012010?feat=directlink
Warangal: http://picasaweb.google.com/konatham.dileep/Warangal28012010?feat=directlink
Nalgonda: http://picasaweb.google.com/konatham.dileep/Nalgonda28012010?feat=directlink
Medak: http://picasaweb.google.com/konatham.dileep/Medak28012010?feat=directlink
Khammam: http://picasaweb.google.com/konatham.dileep/Khammam28012010?feat=directlink
Adilabad: http://picasaweb.google.com/konatham.dileep/Adilabad28012010?feat=directlink

• Click here for Telangana JAC Dharna Photos on picasa
• Courtesy: Dileep Konatham

ఇయ్యాల ‘సమైక్యాంధ్ర’ సోదరులు, తెలంగాణ వేరు పడితె ‘ఆంధ్ర ప్రదేశ్’ పటాన్ని ఊహించుకునుడే బాధాకరమైతదని ప్రజలను భయ భ్రాంతులకు గురి చేస్తున్నరు, మరి 1950, 51 ల జరిగింది ఏంది?

1913 – 1953 మద్య మద్రాస్ ప్రావిన్స్ తోటి కొట్లాడి ఆంధ్ర రాష్ట్రం, గెలుచుకొని సంబరాలు చేసుకున్నరు అని చరిత్ర చెప్తుంది. మరి అప్పుడు ఆంధ్ర రాష్ట్ర ఏర్పాటు ‘వేర్పాటువాదం’ కాకపోతె, ఇప్పుడు తెలంగాణ ఎట్ల అయితది?

1948-53 మద్యల మద్రాస్ నుంచి ప్రచురితమైన ‘బాల’ పిల్లల పుస్తకంల అచ్చయిన ఈ కథనాలను చూస్తె అర్థమైతది.

(Source: BALA childrens magazine 1948-53)

ఎన్‌డీఏ హయాంలో కొత్తగా ఏర్పడిన మూడు చిన్నరాష్ట్రాలు ఎంతో అభివృద్ధి సాధించాయని, చిన్న రాష్ట్రాల వల్ల ఆర్థికంగా, రాజకీయంగా, పరిపాలనాపరంగా స్వయంసమృద్ధికి అవకాశం ఉంటుందని చెప్పారు. ప్రాంతాల మధ్య వైషమ్యాలు అవసరం లేదని, ఒక ప్రాంతం వారు మరో ప్రాంతం వారిని దూషించడం సరైంది కాదని అన్నారు. ‘తెలంగాణ నాది, రాయలసీమ నాది, కోస్తా నాది..’ అన్నపాట ఎన్టీఆర్‌ కోరికమేరకు రాశానని, నాటి పరిస్థితులు నేడు లేవని, ఇప్పుడు ఏ ప్రాంతం వారు ఆ ప్రాంతం కోరుకుంటున్నారని సినారె అన్నారు.

Telangana on Google Maps

Google updates Telangana on its Maps,

click here to visit Google maps

No of Districts:
Seema – 4
Andhra – 9
Telangana – 10

No of Schools :
Andhra : 26800
Seema :13001
Telangana: 17594

Investment on Education:
Andhra : 1308 Crores
Seema : 382 Crores
Telangana : 163 Crores

No of Junior Colleges:
Andhra: 270
Seema : 140
Telangana: 176

No of Civil Service Jobs:
Seema : 44
Andhra : 213
Telangana : 67

No of Judges:
Andhra : 84
Seema : 15
Telangana : 39

No of degree Colleges:
Andhra: 170
Seema : 70
Telangana : 74

No of Lecturers:
Telangana : 66040
Seema : 40552
Andhra : 90435

Govt. Jobs:
SeemAndhra – 9,00,000
Telangana – 3,00,000

Medical colleges:
Andhra : 4
Seema : 4
Telangana :3

Medical Hospitals:
Andhra – 663
Seema – 305
Telangana – 270

55 Years struggle ~So the reason TELANGANA STATES~

Telugu Talli

తెలుగుతల్లి. చల్లని తల్లి. పలు కూడల్లలో ప్రశాంతంగా నిలబడి ప్రజలందరినీ సమానంగా ఆధరించే తల్లి. ఈ తల్లి ఇప్పుడు లొల్లికి నిలయంగా నిలిచింది. తెలంగాణ రాష్ట్ర ఏర్పాటు అడ్డుకోవడానికి కొందరు స్వార్ద రాజకీయ నాయకుల చేతిలో అవసరానికి పనికొచ్చే కీలుబొమ్మగా మారింది.

ఒకప్పుడు ఆంధ్రా నేతలు తెలంగాణాను ఆక్రమించుకోవడానికి చూపించిన, ఈరోజు దోపిడీదార్లు వదలకుండా తెలంగాణాను అంటిపెట్టుకోవాడానికి చూపిస్తున్న ఒకే ఒక్క కారణం, “మనమంతా తెలుగు వాళ్లం, తెలుగుతల్లి బిడ్డలం”.

అవును నిజమే, మనమందరం తెలుగువాళ్లమే, తెలుగుతల్లి బిడ్డలమే. కాదని ఎవరన్నారు. ఇక్కడ ఎవరూ తల్లిని దూరం చేసుకోవాలనుకోవడం లేదు. తల్లి పేరుతో దోచుకునే వాళ్ళని తరమి కొడుతున్నారు. అది ఎంత మాత్రం తప్పు కాదు. నీ మెతుకులు నువ్వు తిను, నా గంజి నేను త్రాగుతా అని తెలంగాణ ప్రజలు మొత్తుకుంటుంటే మధ్యలో వీళ్ళ ఈ తల్లి లొల్లేంది.

తెలంగాణాకు వ్యతిరేకంగా ఒక్కరోజులోనే తెలుగుతల్లి గర్భసంచి నుండి సమైక్యాంధ్ర ఉద్యమాన్ని పుట్టించిన వీళ్ళు అసలు తెలుగుతల్లిని ఎలా పుట్టించారో ఒక్కసారి గుర్తుచేసుకుందాము. మన చుట్టుపక్కల రాష్ట్రాలకు లేని తల్లి భాగ్యం మనకే ఎలా దక్కిందో ఒక్కసారి మననం చేసుకుందాం.

ఈ తల్లి మూలాలు మనకు మొదట ముట్నూరి కృష్ణారావు రచనలో కనబడతాయి. 1913 May 24th కృష్ణాపత్రిక సంపాదకీయం “మాతృసందర్శనం”లో ఆయన మొట్టమొదట ఆంధ్రామాతను ఆవిష్కరించాడు.

“భరతమాత ముద్దుకొమరిత యగుచు
అలరి మన ఆంధ్రమాత వర్దిల్లేడుగాత”

అని ఆంధ్రమాతకు తల్లి భరతమాత అని ఆమె జన్మవృత్తాంతం చెప్పాడు.

1914 లో గడ్డం కొండారెడ్డి “ఆంధ్రమాతృస్తవము” అన్న శీర్షికన పద్యాలు రాశారు. అప్పటికీ ఈతల్లి భావన ఇంకా ప్రజల్లోకి వెళ్ళలేదు. ఏదో కవులు వాళ్ల ఊహల్లో వివరిస్తూ, ప్రాసకోసం ఈ తల్లిని వాడుకోవడం తప్ప ఈ తల్లి భావనను ముందుకు తీసుకెల్లలేక పోయారు.

తర్వాతి కాలంలో రాయప్రోలు “ఆంధ్ర” శీర్షికతో పద్యాలు రాశారు.
“నాదు జాతి నా దేశము నాదు భాష
అను అహంకార దర్శనమందు మాంధ్ర”
అని ఆంధ్రబిడ్డడికి అహంకార దర్శనం ఒంటబట్టించుకోమని నీతిభోద చేసాడు.

ఈ నీతిని నిలువెళ్ళా ఒంటబట్టించుకున్న “శ్రీ” అన్న రచయిత
“భారత…చీ కాదు
ఆంధ్రమాతకు జై”
అని రాసి నిజంగానే ఆంధ్రా అహంకారాన్ని ప్రదర్శించాడు.

ఆతర్వాత కాలంలో వీళ్ల ఆంధ్రోధ్యమంలో రాయలసీమ వాళ్ళను కూడా కలుపుకొని వెళ్ళవలసిన పరిస్థితి వచ్చింది. 1937 లో ఈ రెండు ప్రాంత నేతలు కలిసి “శ్రీ భాగ్” ఒప్పందం చేసుకున్నారు. అప్పుడు ఆంధ్రావాళ్ళు ఆంధ్రమాతకు రూపం మార్చి, కొత్తపేరు చేర్చి “తెలుగుతల్లి” గా నామకరణం చేసారు. అంతకు ముందు ఆంధ్రా అహంకారాన్ని పెంచాలని ప్రయత్నించిన రాయప్రోలు, “తెనుగుతల్లి” పద్యాలు రాసి, తెలుగు వారిమందరమూ తెలుగుతల్లి ముద్దు బిడ్డలమే అని కొత్త పల్లవి అందుకొని ఆంద్రోధ్యమ సాధనలో తల్లిని ముందుంచాడు.

ఇలా ప్రత్యేకాంధ్ర రాష్ట్రం కోసం అప్పట్లో ఆంధ్రోద్యమం, ఈ ఆంధ్రోధ్యమాన్ని ముందుకు తీసుకెళ్ళడానికి ఆంధ్రమాత వెలిసాయి. తర్వాతి కాలంలో రాయలసీమ వాళ్ళని కూడా కలుపుకొని పోవలసిన పరిస్థితి దాపురించండంతో ఆంధ్రమాతకు మారువేషం వేసి తెలుగుతల్లిగా రూపాంతరం చెందించారు.

ఆ తర్వాత ఆంధ్రరాష్ట్రం ఏర్పడడం, తదనంతరం తెలంగాణాను కూడా కలుపుకొని ఆంధ్రప్రదేశ్ ఆవిర్భవించడం జరిగాయి. ఇలా వీళ్ళ అవసరాలు తీరిన తర్వాత చాలా రోజుల వరకు ఈ తల్లిని పట్టిచ్చుకున్న నాథుడే లేకుండా పోయాడు. మళ్లీ ఈ దోరలకు రాష్ట్రంలో కాంగ్రేస్ ను ఎదుర్కొని అధికారాన్ని చేజిక్కించుకోవడానికి తెలుగుతల్లి అవసరం వచ్చింది. నందమూరి తారకరామారావు గారు తెలుగు వాడి ఆత్మ గౌరవం పేరుమీద మళ్ళీ ఈ తల్లిని నెత్తినెత్తుకున్నాడు. అధికారంలోకి రావడానికి ఆయుధంగా వాడుకున్నాడు. ఈ తల్లి దీవెనల ఫలితంగా పదవిలోకి వచ్చిన తర్వాత కృతజ్ఞతగా ఒక రూపం ఇచ్చి, విగ్రహంగా మార్చి కూడల్లల్లో నిలబెట్టాడు.

ఈ సంఘటనలకు, వాటివెనుకున్న భావోద్వేగాలకు అప్పటి/ఇప్పటి తెలంగాణ పోరాటానికి ఎటువంటి సంబంధమం లేదు. తెలుగుతల్లి తెలంగాణ పోరాటానికి, ఈ ఉధ్యమ నిర్మాణానికి ఎన్నడూ సహకరించలేదు. ఆంధ్రా వాళ్ళకి మళ్ళే తెలంగాణ వాళ్ళకి తల్లులను ముందు పెట్టుకొని ఉద్యమం చేసే అవసరం కూడా ఎన్నడూ రాలేదు. అయితే, తెలంగాణ ప్రజలు కూడా తెలుగు మాట్లాడే ప్రజలందరిలాగే తెలుగుతల్లిని ఆరాధించారు తప్ప ఎన్నడూ కూడా దూషించలేదు.

తెలంగాణ కవులుగానీ, కళాకారులుగానీ ఎన్నడూ తెలుగుతల్లిని గానీ, భరతమాతను గానీ తూలనాడలేదు. అగౌరవంగా మాట్లాడి తమ అహంకారం ప్రదర్శించుకోలేదు. ఆంధ్రాకవి భరతమాతను చీకొట్టినా అది సంస్కారంగానే చెలామణి అయ్యింది.

గత ప్రభుత్వ హయాంలో అభివృద్ది పేరు మీద ఎక్కడ ప్రతిష్టించాలో తెలియక గల్లి గల్లి త్రిప్పినప్పుడు ఎన్నడూ నోరు మెదపని ఈ తెలుగుతల్లి ముద్దు బిడ్డలు ఇప్పుడు తమ స్వార్ద రాజకీయ ప్రయోజనాల కోసం తల్లిని రోడ్డుపైకి ఎక్కించారు. తెలుగు వాళ్ళందరమూ ఒక్కటే అని సవతి ప్రేమ చూపించి మళ్ళీ చంకనెక్కడానికి రెడీ అయితున్నరు.

ఇప్పుడు తెలుగుతల్లి తెలంగాణ ఉధ్యమాన్ని ఎదురుకోవడానికి లగడపాటి లాంటి జోకర్ల చేతిలో కీలుబొమ్మలా మిగిలింది. ఒక్కరోజులోనే కావలసిన బిడ్డలను తన గర్భసంచి నుండి పుట్టించి ఇవ్వగల రెడీ మేడ్ అమ్మగా మారింది.

(చారిత్రక ఆధారాలు నందిని సిధారెడ్డి గారు రచించిన “ఇగురం” అన్న పుస్తకం నుండి తీసుకోబడ్డవి)

(Courtesy: greattelangana.org)

• also read మీ తెలుగు తల్లికి మల్లె పూదండ 

(The pot of rice is Hyderabad; The woman represents Telangana people; and the greedy fellow represent the migrants from other regions)

సభ ముందున్న కార్యక్రమం మనముందు ఎవరు పెట్టారో తెలియదు. ముఖ్యమంత్రిగారు పెట్టారో, మరొకరు పెట్టారో తెలియదుగాని పేరు లేకుండా ఇక్కడకు వచ్చింది. ఇది వరలో అష్ట సూత్ర పథకాలు, పంచ సూత్ర పథకాలు వచ్చాయి. వాటికి పట్టిన గతే ఈ ఆరు సూత్రాల పథకాలకు కూడా పడుతుంది. గవర్నరుగారి ప్రసంగ సందర్భంలో ఈ ఆరు సూత్రాల పథకాన్ని ఇక్కడ నేను తగలబెట్టిన సంగతి అందరికీ తెలిసినదే.ఇక్కడ ఏమని రాశారంటే, ఇక్కడ నాయకులతో అనేక సార్లు చర్చించామని, వారిలో వారు కూడా చర్చించుకున్నారని ఉంది. ఎవరు ఎవరితో చర్చించారో మాకు తెలియదు. ఈ రాజ్యం కాంగ్రెస్‌ వాళ్ళ అబ్బ సొమ్మా అని అడుగుతున్నాను. కాంగ్రెస్‌ పార్లమెంటు మెంబర్లు, శాసన సభ్యులతో మాట్లాడితే సరిపోయిందా అని అడుగుతున్నాను. ఆంధ్ర, తెలంగాణ ప్రశ్న వచ్చినప్పుడు తెలంగాణ వారు ఎప్పుడూ ఆంధ్రతో కలియడానికి సిద్ధంగా లేరు.

రాయలసీమ వారు కూడా కలియడానికి ఇష్టం లేకపోతే శ్రీబాగ్‌ ఒప్పందం అని పెట్టి వారిని కలుపుకున్నారు. ఇక్కడ కూడా ప్రజలకు కలవడానికి ఇష్టం లేకపోయినా వెంకటరెడ్డిగారు కొన్ని షరతులపై కలుస్తామని ఒప్పుకున్నారు. వాటిని మేము కూడా ఒప్పుకుం టాము అన్న తర్వాతనే ఆంధ్రప్రదేశ్‌ ఏర్పడింది. నాయకుల మధ్య జరిగిన ఒప్పందం పెద్ద మనుషుల ఒప్పం దం అయినది. ఆ విధంగా పదమూడు సంవత్సరాలు నడిచింది. మంత్రి పదవులు కావాలి అనుకున్నవారికి దొరికాయి. శాసన సభ్యులు కాదలచుకున్నవారు అయినారు. వారు ఇక్కడ డబ్బు సంపాదించుకున్నారు. బ్లాక్‌ మార్కెట్టు కోసం పైరవి చేసుకున్నారు. మంత్రులు చాలా సుఖంగా ఉండిపోయినారు. తెలంగాణ వారి బాధలను మరిచిపోయినారు.

పదమూడు సంవత్సరాలైన తర్వాత ఉద్యమం లేవతీసినారంటే, నాయకులు లేవతీయలేదు. విద్యార్థులు లేవతీసినారు. ఉద్యోగులు లేవతీసినారు. క్లాస్‌ 4 ఉద్యోగులు లేవదీసినారు. టీచర్లు లేవతీసినారు.వారంతా లేవతీసిన తర్వాతనే ఇక్కడ లీడర్లు దానిలో పూనుకున్నారు. కాంగ్రెస్‌ నుంచి కొంతమంది లీడర్లు వచ్చి పవిత్రమైన మూవ్‌మెంట్‌ను స్టాప్‌ చేసి ఆరు సూత్రాలు, 7సూత్రాలు, 8 సూత్రాలు అనుకొని వెళ్లిపోయారు.

కేంద్రం కూడా విఫలం అయినది. చవాన్‌ను పంపించి స్పాట్‌ ఎంక్వయిరీ చేయమన్నారు. 69లో ఒకనాడు ఇందిరాగాంధీ గారు ఏ రాత్రి వచ్చారో వెళ్లిపోయారు. 1972 ఎలక్షన్స్‌ మ్యానిఫెస్టోలో కూడా తెలంగాణా గురించి న్యాయం చేస్తామని ప్రామిస్‌ చేశారు. ఫెయిర్‌ డీల్‌ టు ది తెలంగాణ అని వరంగల్లులో ఇందిరాగాంధీ గారు స్వయంగా తెలంగాణ ప్రజలకు చెప్పారు. కానీ ఎలక్షన్‌ కాగానే తెలంగాణను మర్చిపోయారు.ఆంధ్రలో పెద్ద ఉద్యమం లేవదీసినారు. వెంగళరావుగారు ముఖ్యమంత్రి అయితే గొప్ప గొప్ప మాటలు చెప్పిన వారే, అమాయకులైన బిడ్డల ప్రాణాలు తీయించిన వారే మంత్రులు అయినారు. ప్రత్యేక ఆంధ్ర కావాలన్న వారు ఈనాడు మినిష్టర్లు అయినారు. ఇది వరకు ప్రత్యేక తెలంగాణ కావాలనిన వారు మంత్రులు అయినట్లే, ఆంధ్ర కావాలని అనినవారు మంత్రులు అయినారు.

సెపరేషన్‌ మంచిది. పంజాబ్‌, హర్యానా చిన్న రాష్ట్రాలుగా అయిన తర్వాత చాలా అభివృద్ధి అయినవి.సముద్రం లాంటి పెద్ద స్టేట్‌తో కలిసి ఉండటం వల్ల తెలంగాణ అభివృద్ధి కాదు. తెలంగాణ వెనుకబడి ఉంది.మాకు సెపరేటు స్టేట్‌ కావాలని మేము అంటున్నాం. ఆరు సూత్రాల పథకం మూలంగా తెలంగాణ రీజియనల్‌ కమిటీ ఖతం అయినది. ముల్కీ రూల్సు ఖతం అయినవి. తెలంగాణ వారి గతి ఏమయినది? తెలంగాణ వారు అనాథలు అయినారు. ఎవరికి చెప్పుకోవాలి? ఏమి చెప్పుకోవాలి?

(Courtesy: Suryaa)

ఈ కార్యక్రమానికి టీడీపీ పొలిట్‌బ్యూరో సభ్యుడు, పాలకుర్తి ఎమ్మెల్యే ఎర్రబెల్లి దయాకరరావు తదితరులు హాజరు కావడం విశేషం. ఈ సందర్భంగా దయాకరరావు మాట్లాడుతూ, టీడీపీ నాయకురాలై ఉండి నన్నపనేని లగడపాటికి ముద్దు పెట్టడాన్ని ఈ ప్రాంత ప్రజలు జీర్ణించుకోలేక ఇలా నిరసన వ్యక్తం చేస్తున్నారన్నారు. ఈ నిరసన కార్యక్రమానికి భారీగా జనం తరలి రావడంతో 202 జాతీయ రహదారిపై గుడెప్పాడు నుంచి నీరుకుళ్ల దాకా, నీరుకుళ్ల క్రాస్‌ నుంచి మహ్మద్‌ గౌస్‌పల్లి దాకా ఎటు చూసినా దాదాపు 15 కిలోమీటర్ల మేర ట్రాఫిక్‌ స్తంభించిపోయింది.

జిల్లా కోర్టుల సముదాయం ఎదుట రోడ్డుపై హన్మకొండ సుబేదారిలో న్యాయవాదులు వంటావార్పు నిర్వహించి సహపంక్తి భోజనాలు పెట్టారు. వరంగల్‌ పోచమ్మైదాన్‌ సర్కిల్‌లోనూ ఇదే విధమైన నిరసన వ్యక్తం చేశారు. జిల్లాలో మొదటిసారిగా రైల్వే కార్మికులు స్పందించారు. దక్షిణ మధ్యరైల్వే షావుకార్‌, హమాలీస్‌ యూనియన్‌ ఆధ్వర్యంలో వరంగల్‌ రైల్వే స్టేషన్‌ నుంచి పోచమ్మైదాన్‌ దాకా భారీ ర్యాలీ నిర్వహించారు.

మొత్తంగా వరంగల్‌ జిల్లా నిరసనలతో హోరెత్తింది. మహబూబ్‌నగర్‌ జిల్లాలోని పాలమూరు వర్సిటీ విద్యార్థులు చంద్రబాబు, చిరంజీవి, మోహన్‌బాబు, రోజా, లగడపాటి, జగన్‌, నన్నపనేని, జేసీ దివాకర్‌రెడ్డిల బొమ్మలతో తయారు చేసిన రావణాసురుణ్ని ఊరేగించి దగ్ధం చేశారు. జడ్చర్ల ప్రధాన కూడలిలో మహిళలు బతుకమ్మ ఆడుతూ నిరసన తెలిపారు. కొల్లాపూర్‌లో ఉద్యోగులు, ప్రజా సంఘాలు, రాజకీయ నేతలు కాళ్లు, చేతులకు సంకెళ్లు వేసుకొని వీధుల్లో తిరిగారు.

యూనివర్సిటీల్లో దీక్షల హోరు
యూనివర్సిటీలు తెలంగాణ పోరుతో హోరెత్తుతున్నాయి. పోరులో భాగంగా తెలంగాణ వ్యాప్తంగా యూనివర్సిటీల్లో విద్యార్థుల దీక్షలు సాగుతున్నాయి. ఉస్మానియాలో దీక్షా శిబిరాన్ని పోలీసులు తొలగించినప్పటికీ, విద్యార్థులు ఆస్పత్రిలోనే దీక్షను కొనసాగిస్తున్నారు. వారికి మద్దతుగా మరికొంత మంది విద్యార్థులు ఆర్ట్స్‌ కళాశాల వద్ద రిలే దీక్షలు చేస్తున్నారు. ఆర్ట్స్‌ కళాశాల వద్ద తొలగించిన టెంట్‌ను తిరిగి ఇవ్వాలని మంగళవారం అధ్యాపకులు పోలీసులను డిమాండ్‌ చేశారు. ఈలోగా పోలీస్‌ స్టేషన్‌ వైపు వెళుతున్న విద్యార్థులను పోలీసులు అడ్డుకోవడంతో కాసేపు ఉద్రిక్తత నెలకొంది. చివరకు అధ్యాపకుల కోరిక మేరకు ఒక చిన్న టెంట్‌ను పోలీసులు తిరిగి ఇచ్చేశారు.

వరంగల్‌ జిల్లా కాకతీయ వర్సిటీలో విద్యార్థుల ఆమరణ దీక్ష కొనసాగుతోంది. పాలమూరు విశ్వవిద్యాలయంలో విద్యార్థుల దీక్షలు మూడో రోజుకు చేరుకున్నాయి. దీక్ష చేస్తున్న వారికి మంగళవారం పరీక్షలు చేసిన వైద్యులు, వీరిలో ఆరుగురి పరిస్థితి ఆందోళనకరంగా ఉందని చెప్పారు. దీంతో పోలీసులు వారిని ఆస్పత్రికి తరలించారు. ఆ సమయంలో పోలసులకు, విద్యార్థులకు మధ్య తీవ్రంగా తోపులాట చోటు చేసుకుంది.

కరీంనగర్‌లోని శాతవాహన యూనివర్సిటీలో విద్యార్థుల దీక్ష నాలుగో రోజుకు చేరింది. వీరిని పోలీసులు ఆస్పత్రికి తరలించారు. వీరిలో నాగరాజు అనే విద్యార్థి ఆరోగ్యం క్షీణించడంతో అతన్ని ఆస్పత్రిలో ఉంచి మిగిలినవారిని పోలీసులు రిమాండ్‌లో ఉంచారు. ఖమ్మం జిల్లా అశ్వారావుపేట వ్యవసాయ కళాశాల విద్యార్థుల రిలే దీక్షలు కొనసాగుతున్నాయి. నిజామాబాద్‌లోని తెలంగాణ వర్సిటీ జేఏసీ నాయకులు రిలే నిరాహార దీక్షలు చేపట్టారు.

నాగం కేసును బనాయిస్తే సహించం: జేఏసీ
ఉస్మానియా వర్సిటీ జేఏసీ నాయకులు కుమారస్వామి, స్టాలిన్‌లను మంగళవారం మధ్యాహ్నం హైదరాబాద్‌లో పోలీసులు అదుపులోకి తీసుకున్నారు. దీనిపై జేఏసీ వర్గాల్లో తీవ్ర ఆందోళన వ్యక్తమైంది. దీంతో వారు వెంటనే మానవ హక్కుల కమిషన్‌ను సంప్రదించారు. కమిషన్‌కు కూడా పోలీసులు సరైన సమాధానం ఇవ్వలేదని తెలిసింది. కాగా.. జేఏసీ నేతలిద్దరూ సీఐడీ పోలీసుల అదుపులో ఉన్నట్టు సమాచారం. సీఐడీ అదుపులో ఉన్న వారిద్దరినీ నాగం జనార్దనరెడ్డిపై జరిగిన దాడి కేసులో ఇరికించే ప్రమాదం ఉందని విద్యార్థులు ఆందోళన వ్యక్తం చేస్తున్నారు.

అంతే కాకుండా బుధవారం బంద్‌ జరగనున్న దృష్ట్యా… జరిగే అవాంఛనీయ సంఘటనలు ఏవైనా వారిపైకి తోసే కుట్ర జరుగుతోందనే అనుమానాలు వ్యక్తమవుతున్నాయి. అందుకే మేజిస్ట్రేట్‌ ముందు హాజరు పర్చకుండా తాత్సారం చేస్తున్నారని విద్యార్థులు ఆరోపిస్తున్నారు. విద్యార్థులను వెంటనే విడుద ల చేయాలని, నాగం జనార్దన్‌రెడ్డిపై జరిగిన దాడి కేసును బనాయిస్తే సహించేది లేదని తెలంగాణ రాజకీయ జేఏసీ తీవ్రంగా హెచ్చరించింది.

(Courtesy: AndhraJyothy)

అనంతరం స్థానిక రిపబ్లిక్‌ పార్టీ కార్యకలాపాల్లో పాల్గొనే నరేందర్‌ రెడ్డి తెలంగాణ సంస్కృతిని పరిరక్షించేందుకు, రాజకీయ, ఆర్థిక, సామాజిక అభివృద్ధి సాధించేందుకు ప్రత్యేక రాష్ట్రం అవసరమని అభిప్రాయపడ్డారు. అయిదవ అతిపెద్ద రాష్ట్రాన్ని విడగొట్టి ప్రాధాన్యతలేని రాష్ట్రాలస్థాయికి చేరిపోతామంటూ ఆంధ్రలో పలువురు నేతలు వ్యక్తం చేస్తున్న ఆందోళనపై ఆయన స్పందించారు. తెలంగాణ రాష్ట్రం ఇచ్చినప్పటికీ అంతకంటే చిన్న రాష్ట్రాలు 17పైనే వుంటాయని, ఇది అభివృద్ధికి ఒక అవకాశమని వివరించారు. హైదరాబాద్‌లో అన్ని ప్రాంతాల వారూ ఉండవచ్చన్నారు. ఆ తర్వాత తెలంగాణ డెవలప్‌మెంట్‌ ఫోరమ్‌కి చెందిన వివేక్‌రెడ్డి 1969 తెలంగాణ ఉద్యమంలో తన అనుభవాలు, తెలంగాణ ప్రాంత వ్యవసాయ పరిస్థితులు, ప్రాజెక్టులపై తన అభిప్రాయాల్ని వెల్లడించారు. అలాగే చంద్రమోహన్‌ నెల్లుట్ల మాట్లాడిన తర్వాత పలువురు ఎన్నారైలు అడిగిన ప్రశ్నలకు నిర్వాహకులు సమాధానాలు ఇచ్చారు. చివరిగా ముగ్గురు చిన్నారులు జనగణమన ఆలపించారు. ఆనంద్‌ గార్లపాటి, ఆట సభ్యులు కరుణాకర్‌ రెడితో పాటు పలువురు ప్రవాస ప్రముఖులు హాజరై తమ మనోభిప్రాయాలు వెల్లడించినందుకు నిర్వాహకులు కృతజ్ఞతలు తెలియజేయడంతో సమావేశం ముగిసింది.

(Courtesy: AndhraJyothy)

Note: Small correction done to the original article

తెలంగాణ రాష్ట్ర సాధన కోసం ఉద్యమం గత 50 యేండ్ల నుంచి సాగుతున్నది. తెలంగాణ ప్రజాసమితికి ప్రజలు బ్రహ్మ రథంపట్టి అఖండ మెజార్టీతో గెలిపించితే అనేక మంది నాయకులు తమ స్వార్థంతో  అమ్ముడుపోవడంతో ఉద్యమంలో కొంత స్తబ్దత ఏర్పడింది. మళ్లీ పి.ఇంద్రారెడ్డి ఏర్పాటు చేసిన తెలంగాణ ఉద్యమ కమిటి, భువనగిరి తెలంగాణ వాదుల సమావేశం, వరంగల్‌ డిక్లరేషన్‌,

తెలంగాణ మహాసభ, తెలంగాణ జనసభలతో ఉద్యమం మళ్లీ మొలకెత్తింది. 2001 టిఆర్‌ఎస్‌ ఆవిర్భావం ఉద్యమం ఊపు అందుకుంది. అయితే కెసిఆర్‌ ఆమరణ నిరాహారదీక్ష ప్రభావంతో తెలంగాణ పోరాటం విద్యార్థుల, ప్రజల, కవులు, కళాకారులు, జర్నలిస్టుల చేతుల్లోకి వెళ్లింది వాస్తవం. మారుమూల గ్రామాల సాధారణ మహిళలు సైతం నేడు బయటకు వచ్చి ‘జై తెలంగాణ అంటున్నారు. ఈ వాస్తవాన్ని ఇప్పటివరకు తెలంగాణ మీదా స్పష్టమైన వైఖరి తెలపని కాంగ్రెస్‌ నాయకులు కూడ అంగీకరిస్తు న్నారు.

వలసవాదుల పాత్ర ప్రశ్నార్థకం
అయితే ఇదే తరుణంలో రాష్ట్ర మంత్రులు దానం నాగేందర్‌, ముఖేష్‌గౌడ్‌లతో పాటు కొందరు ఆంధ్ర వలస వాదులు హైదరాబాద్‌ విషయాన్ని ప్రస్తావిస్తూ ప్రత్యేక ప్రాంతంగా ప్రకటించాలని డిమాండ్‌ చేస్తున్నారు.హైదరాబాద్‌ అభివృద్ధిలో ఆంధ్ర వలసవాదుల పాత్ర ఉన్నదని గట్టిగా ఉదహరిస్తున్నారు. నిజానికి హైదరాబాద్‌ చరిత్రలో ఆంధ్ర వలసవాదుల పాత్ర ఏమిటో? అంతు చిక్కని ప్రశ్న. పట్టణంలోని చారిత్రాత్మక కట్టడాలకు వారు రాళ్లు ఎత్తారా? సున్నం మోసారా? కనీసం నీళ్లు చల్లారా? అనే దానికి ఆధారాలు లేవు.అయినప్పటికి తెలంగాణకు తల లాంటి హైదరాబాద్‌ మీదనే గురి పెట్టారు.

వలస వాదులు హైదరాబాద్‌కు ఎప్పుడు వచ్చారు? పరిశ్రమలు ఎప్పుడు పెట్టారు? తెలంగాణ సంస్కృతి ఏమి చేసారు అనేది ఇక్కడ చర్చ కాదు. కాని హైదరాబాద్‌ తదుపరి 120 సంవత్సరాల చరిత్ర సింగరేణికి ఉన్నది. తెలంగాణకు తల మానికంగా, ఉద్యోగ, ఉపాధి కేంద్రంగా విరాజిల్లుతుండేది. అయితే అప్పటి నుంచి సింగరేణిలో అధికారులందు ఆంధ్రులే. సివిల్‌ కాంట్రాక్టర్లు, సూపర్‌వైజర్లు, క్లర్క్‌లు, జిఎంలు, చివరికి డైరక్టర్లలో అధికంగా ఆంధ్రులుండగా కేవలం కార్మికులు మాత్రమే తెలంగాణ వారున్నారు. చివరికి తెలంగాణ ఉద్యమం వచ్చిన తదుపరి ఇక్కడి ఉద్యోగాలను కొల్లగొట్టుతూ ఇక్కడి బొగ్గు సంపదను ఆంధ్రాకు ఎత్తుకెళ్ళ డానికి ఆగమేఘాల మీద తవ్వుతున్నా ఓపెన్‌కాస్టుల ఓబి కాంట్రాక్టర్లు కూడా రాయలసీమ, ఆంధ్రప్రాంతం వారే. మరీ ఇదే తరుణంలో హైదరాబాద్‌ను ప్రత్యేక ప్రాంతంగా డిమాండ్‌ చేస్తున్నట్లు సింగరేణి విస్తరించిన నాలుగు జిల్లాలను కూడ ప్రత్యేక జిల్లాలుగా అడగవచ్చుకదా?

అంతేకాకుండా హైదరాబాద్‌ తదుపరి తెలంగాణలో పెద్ద పట్టణమైన వరంగల్‌ చుట్టు పక్కల అనేక గుంటూరు పల్లెలున్నారు. ఈ పల్లెలనన్నీ ప్రత్యేక గ్రామాలుగా గుర్తించా లంటే ఎలా? వరంగల్‌ జిల్లాలోని మంగపేట, కమలాపూర్‌, పస్రా, గోవిందరావుపేట, రామన్నపేట, నిజామాబాద్‌ జిల్లాలో డిచ్‌పల్లి, బాల్కొండ, వర్నీ ఆదిలాబాద్‌ జిల్లాలో మంచిర్యాల ఎసిసి లాంటి ప్రాంతాలలో వలసవాదులదే ఆదిపత్యం. ఇక ఖమ్మం జిల్లా సరిహద్దు గ్రామాల పరిస్థితి సరేసరి. మరి ఈ గ్రామాలను కూడ ప్రత్యేకంగా ప్రకటిం చాలనే డిమాండ్‌ వస్తే ఎలా? కోనేరు కోనప్ప, మండవ వెంకటేశ్వర్‌రావులాంటి వలసవాదులు తమ నియోజక వర్గాలను ప్రత్యేకంగా గుర్తించాలంటే ఎలా? ఆదిలాబాద్‌ జిల్లాలోని నల్లరేగడి భూముల మీదా కన్నువేసి నేడు వేమన్‌పల్లి, లాంటి మారుమూల గ్రామాలలో భూము లను కౌలుకు తీసుకుని పత్తి పండిస్తున్నా గుంటూరు జిల్లా రైతులు ఆ భూములను ప్రత్యేకంగా తమకే కేటాయించాలంటే ఎలా? హైదరాబాద్‌ మీదా హక్కు కోరే ఆంధ్ర వలస వాదులు వారికి మద్దతునిచ్చే మంత్రులు ఈ ప్రశ్నలకు సమాధానం చెబితే బాగుంటుంది.

హైదరాబాద్‌ అభివృద్ధి జరిగిందా?
ఆంధ్ర వలసవాదులు వాదిస్తున్నట్లు నిజంగా హైదరా బాద్‌ అభివృద్ధి చెందిందా? అదే నిజమైతే పాతబస్తీ పరిస్థితి ఏమిటి, వలస వాదులు హైదరాబాద్‌లో ఏర్పాటు చేసిన పరిశ్రమలలో తెలంగాణ వాసుల ఉద్యోగాల వాటా ఎంతో చెప్పగలరా? హైదరాబాద్‌ను కాలుష్య పట్టణంగా మార్చి లాభాలు గడించారే తప్పా. ఇక్కడి వారికి ఉద్యోగాలు దక్కలేదు, అభివృద్ధి జరగలేదనేది వాస్తవం. ఇదే తరుణంలో మంత్రులు నాగేందర్‌ ముఖేష్‌లు కొన్ని ప్రశ్న లకు సమాధానం చెప్పాలి. సింగరేణిలో వలస వాదులు ఉద్యోగాలు చేస్తున్నట్లు విశాఖ స్టీల్‌ ప్లాంట్‌లో, తిరుపతి దేవస్థానంలో తెలంగాణ ప్రాంత ఉద్యోగులు ఎందరున్నారో చెప్పితే బాగుంటుంది.

వాస్తవానికి కెసిఆర్‌ దీక్ష మీదా, ముక్కుపచ్చలారని పిల్లల ఆత్మహత్యల మీదా, మంచి ఉద్యోగం ఉన్నా కానిస్టేబుల్‌ కిష్టయ్య బలిదానం, ఎస్‌ఐ శ్యాంసుందర్‌ త్యాగం, శ్రీకాంత్‌చారీ లాంటి భావితర మేధావి ఆత్మహత్యల మీదా స్పందించాల్సిన మంత్రులు హైదరాబాద్‌ మీద అర్థరహితంగా స్పందించడం శోచ నీయం.తెలంగాణ ప్రాంతాన్ని బొందలగడ్డగా మారుస్తున్నా ఓ్వపెన్‌కాస్టుల మీదా ఒక్క మంత్రి మాట్లాడారు.మంత్రులు నాగేందర్‌, ముఖేష్‌లతో పాటు కొందరు వలస వాదులకు హైదరాబాద్‌ మీదా భ్రమలుండవచ్చు.లేదా తెలంగాణ సమస్యను జటిలం చేయడానికి ఎత్తుగడ కావచ్చు. కానీ ప్రత్యేక తెలంగాణ రాష్ట్రం రావడం, దానికి హైదారాబాద్‌ రాజధానిగా ఉండడం ఖాయం. ఇది రేపటి సూర్యోదయ  మంతటి నిజం.ప్రాణమైన విడుస్తారు కానితెలంగాణ ప్రజలు హైదరాబాద్‌ను వదలరు.

(Courtesy: Vaartha)

తెలగాణ రాష్ట్రం ఏర్పడే వరకు నిర్మాణాత్మకమైన ఉద్యమాన్ని శాంతియుతంగా ముందుకు తీసుకుని వెళ్లాలని తీర్మానం చేశామని జేఏసీ కన్వీనర్‌ కొలను వేంకటేశ్వర్‌రెడ్డి తెలిపారు. తెలంగాణ ఉద్యమానికి ప్రతినెల తెలంగాణ జేఏసీ ఉద్యోగులు తెలంగాణ రాష్ట్రం వచ్చేంతవరకు ఒకరోజు వేతనాన్ని విరాళంగా ఇవ్వాలని, తెలంగాణ ఉద్యమంలో అమరులైన వీరుల కుటుంబాలను ఆర్ధికంగా ఆదుకోవాలని తీర్మానించామని ఆయన వివరించారు. తెలంగాణ రాష్ట్ర సాధన కోసం తాము చేస్తున్న ఉద్యమం క్రమశిక్షణకు విరుద్దం కాదని, విధి నిర్వహణ పూర్తయిన తర్వాతే పనిచేస్తామని, నిబంధనలకు వ్యతిరేకంగా తామేమీ వ్యవహరించమని ఆయన పేర్కొన్నారు.

జైళ్లశాఖ నుంచి వై.వెంకటరెడ్డి, ఎక్సైజ్‌ నుంచి టి.రవీందర్‌ రావు, డి.అరుణ్‌కుమార్‌, ఫారెస్టు డిపార్ట్‌మెంట్‌ నుంచి ఎం.రామకృష్ణారావు, వి.తిరుమలరావు,ట్రాన్స్‌పోర్టు డిపార్ట్‌మెంట్‌ నుంచి ఎస్‌ఎన్‌ రెడ్డి, పి.రవీందర్‌కుమార్‌, జి.చందన్‌కుమార్‌, ఫైర్‌ డిపార్ట్‌మెంట్‌ నుంచి వై.ప్రభాకర్‌రెడ్డి,పోలీసుశాఖ నుంచి ఆర్‌.సుదర్శన్‌, జే.రమేష్‌ ప్రతినిధులుగా ఎంపికయ్యారు. ఈ క్రమంలోనేజిల్లాల వారీగా ఏడు డిపార్ట్‌మెంట్ల స్టీరింగ్‌ కమిటీని ఏర్పాటు చేస్తున్నారు. వీరికి సంఘీభావంగా తెలంగాణ ఉద్యోగుల సంఘం నాయకుడు శ్రీనివాసగౌడ్‌ తదితరులు హజరయ్యారు

డిసెంబర్ 25 క్రిస్ట్ మస్ రోజు,. ఒక మంచు కురిసిన ఉదయం. ఎముకలు కొరికే చలి పులి క్రూరంగా రక్కుతున్న వేళ! ప్రిన్స్ టన్ న్యూ జెర్సీ లో తెలంగాణ కు చెందిన ఎన్ ఆర్ ఐ లు ఒక సమూహంగా ఏర్పడి తెలంగాణ కోసం ముక్తకంఠంతో నినదించిన అపురూప సందర్భం.

అమెరికా పర్యటనలో నున్న ప్రఖ్యాత చిత్రకారుడు, తెలంగాణ ముద్దు బిడ్డ  లక్ష్మణ్ ఏలే న్యూ జెర్సీ విచ్చేసిన సందర్బంగా తెలంగాణ ఎన్ ఆర్ ఐ లు అతనిని సందర్శించారు. చిత్రకారుడు లక్ష్మణ్ ఏలే  రాత్రి కురిసిన మంచు కాన్వాసు పైన ‘పిడికిలి బిగించిన మక్క కంకి’ ని చిత్రించి ‘జై తెలంగాణ’ అంటూ  ఎర్రటి అక్షరాలు రాసారు. గొప్ప  స్ఫూర్తినిచ్చే ఆ అద్భుతమైన వేదిక మీద నిలబడ్డ న్యూ జెర్సీ తెలంగాణ వాసులు, తెలంగాణ చిత్రపటం ముద్రించిన టీ షర్టులు వేసికొని, ‘జై తెలంగాణ’ బానర్ పట్టుకుని,  ఒక సమూహంగా ఏర్పడి తెలంగాణ ప్రత్యేక రాష్ట్రం కోసం గొంతెత్తి నినాదాలు చేసారు.  ‘సమైక్యాంధ్ర వద్దు తెలంగాణ ముద్దు’, ‘సమైక్యాంధ్ర నినాదం బూటకం – సీమాంధ్ర పాలకుల నాటకం’, ‘సీమాంధ్ర పాలకుల సాంస్కృతిక, ఆర్థిక, రాజకీయ ఆధిపత్య దోపిడీ నశించాలి’, తెలంగాణ కావాలి త్వర త్వరగా తెలంగాణ రావాలి ‘, ‘ తెలంగాణ ప్రత్యేక రాష్ట్ర ఆకాంక్ష ప్రజాస్వామికం – తెలంగాణ ఆత్మగౌరవం వర్ధిల్లాలి’, జై తెలంగాణ జై జై తెలంగాణ’ అంటూ  ఒక్క గొంతుకతో నినదించారు.  గొప్ప స్ఫూర్తినిచ్చే చిత్రం గీసినందుకు లక్ష్మణ్  ఏలే ను అంతా అభినందించారు.

Christmas Day Telangana

సురేందర్ మద్ది, అనిత కోరమంగళ, నాగేశ్వర్ కడకుంట్ల, నరసింహ మేకల, వేణు దూది, వెంకటేశ్వర్లు చిలుకమారి, వెంకట్ పిల్లి, అమర్ పురుమాండ్ల, ఆనంద్ అల్లాల, సుకుమార్ , విద్య వెంకటయోగి, తుహిన వెంకటయోగి, తుషిర వెంకటయోగి, రోహన్ మేకల, వరుణ్ పిల్లి, అవి పిల్లి, మానస ఏలే, లలిత ఏలే, శిరీష విశ్వనాథుల, శ్రీనివాస్ కాథోజు, ప్రభావతి కాథోజు, హరిణి కాథోజు, నారాయణ స్వామి, లక్ష్మణ్ ఏలే తదితరులు ఈ కార్యక్రమంలో అత్యుత్సాహంగా పాల్గొన్నారు. తెలంగాణ ఆశలకీ, ఆకాంక్షలకీ అందరి మనసులూ  అద్దం పట్టాయి.

*For more pictures visit: NJ_TNRI photos on Picasa